Mizo ṭawng ṭhangtharte zirtirna turin milem bu hmanga hmalak tum a ni - Minister
College leh university-a Mizo subject zirtirtu pawl - Mizo Literature and Language Teachers' Academy (MILLTA) chuan nimin khan J Thankima College-ah inkhawmpui an hmang a, Higher & Technical Education minister Dr Vanlalthlana'n a hmanpui.
HTE Minister chuan, Mizo ṭawng humhalh tur leh ṭhangtharte hnena zirtir zel turin milem bu (comics) hmanga hmalak tum a nih thu sawiin, "Tunah hian Samagra leh SCERT hnuaiah nun dan ṭha inzirtirna (moral reform) bakah, Mizo ṭawng leh nihna zirtir thei chi comics siam zel tum a ni," a ti.
Dr Vanlalthlana chuan, Mizo Language Development Board chungchang sawiin, "Mizo Language Development Board hi ṭangkai taka hman kan tum a, ṭangkai zawka hman a nih theih nan a kalhmang turte duan ṭhat mek a ni," a ti a; Mizo ṭawng tihmasawn tura sorkar hmasain Mizo Language Development Board a din chu lawmawm a tih thu leh Mizo ṭawng ziah zawm leh ziah zawm loh chungchang te, Mizo ṭawng humhalh chungchangte la zirho zel ṭha a tih thu a sawi.
HTE Minister chuan, college leh university-a Mizo zirtirtute chu Mizo ṭawng humhalhtu, Mizo nihna vawng nungtu an nih thu a sawi a, "Mizo subject-a zirtirtu, college-a post ruak awmte a ṭul ang zela hnawhkhah tum a ni," a ti.
MILLTA inkhawmpui hi an president Prof. C Vanlalhruaia'n a kaihruai a, Aizawl, Mamit, Kolasib, Zawlnuam, Lunglei, Serchhip, Chawngte leh hmun dang aṭangin member-te an tel. Secretary Dr H Laldinmawia an pawl dinhmun tlangpui a tarlang a; adviser Prof. Laltluangliana Khiangte leh J Thankima College principal Prof. JV Nunchunga ten pawhin thu an sawi bawk.
Gereral Secretary tarlan danin, MILLTA hi kum 1988-a din a ni a, Mizorama college-te leh Mizoram University leh ICFAI University aṭangin member 119 an tel.
Inkhawmpui chawhnu lamah 'Mizo drama zirchianna' tih thupui hmangin zirhona buatsaih a ni a, mithiam 16-te'n Mizo Lemchan zirchianna paper 13 an buatsaih zirho a ni. Zirhona paper, lehkhabua siam leh MILLTA danpui leh member bu chu HTE Minister-in a tlangzarh.