KHAWTHLIR
MIC-in ko leh
Mizoram Information Commission chuan Mizoram RTI Online-a state public information officer (SPIO) la in register lo department hrang hrang 15-a hotute chu nimin khan an ko leh a; chief information commissioner John Neihlaia leh information commissioner Mangjangam Touthang ten RTI Online-ah indah lut thuai turin an hriattir. MIC hian December 16, 2024 khan department 11 hotute an lo ko tawh bawk.
PTS Thenzawlah Winter Carnival
Police Training School, Thenzawl chuan an hmunah Winter Carnival an buatsaih a, nimin khan PTS principal Ruatsanga Ralte-in a hawng. Winter Carnival-ah hian intihhlimna chi hrang hrang leh zan lamah concert buatsaih a ni a; vawiinah chhunzawma zawh a ni ang.
Report pharh
Mizoram Legislative Assembly hnuaia Committee on Estimates chuan nimin khan an chairman W Chhuanawma hoin Assembly speaker Lalbiakzama hnenah 'Committee on Estimates First Report on Aizawl-Thenzawl-Lunglei World Bank Road under Public Works department' an pharh. Report-ah hian Aizawl-Thenzawl-Lunglei World Bank Road siam hna thawh an endikna leh zirchiannate tarlan a ni.
Social audit thlirlet
Social Audit Unit (SAU), Mizoram buatsaihin nimin khan Secretariat conference hall-ah December 10, 2024-a MGNREGS hnuaia Mizoram khaw 301-a social audit neih zawh tâk thlirletna hun hman a ni. Thlirletna hi SAU director C Laltleipuii'n a kaihruai a; district leh block hrang hranga hmalak chhunzawm tur te, bawhzui leh siamṭhat ngaite sawiho a ni.
Phalna lak ngai
Serchhip DC Paul L khuma chuan hriattirna chhuahin, Krismas leh kum thar vuakvêtah permit nei lo tan Serchhip khawpuia kawngpui sir leh kawtthlerah thil zuara inpho phal a nih loh thu a tarlang. Thil zuara inpho (temporary street vending) tur chuan VC phalna leh hriatpuina lehkha nen UDPA office-ah phalna lak hmasak tur a nih thu a tarlang bawk.