Mamit VC-te'n Union Minister an hmu; Mamit dist. kawng siam vat turin an ngen

Mamit Joint Village Council member-te chuan Lok Sabha MP Richard Vanlalhmangaiha kaihhruaiin nimin khan sorkar laipuia Road Transport & Highways minster of state Ajay Tamta a pisaah an hmu a; National Highway 44A/108 siam vat a nih theih nan tender chhuah nawn phalsak vat tur leh Mamit district-a kawngpui hrang hrangte siam a nih theih nan hma la turin an ngen.

Mamit VC-te hian Ajay Tamta hnenah hian NH-44A/108 chu ṭhangkhat lian dawn siam a nih hnuah pawh zawh a la nih loh avangin mipuiin harsatna nasa tak an tawrh thu an sawi a; Mamit district chu Aspirational District a nih angin ngaih pawimawh bik a ṭul thu an thlen.

Tun ṭhâl chhunga NH-44A/108 siam a nih theih nan siamna tur pawisa pek chhuah vat a nih loh chuan nakum fûrah a chhiat nasat lehzual thu an sawi a; tun ṭhál chhung ngeia siam a nih theih nan department-in estimate cheng vbc. 166 an siam chu pawmpui vat a nih theih nan hma la turin an ngen a ni.

Mamit district-a kawngpui dang, NH-6 (Mamit-Bairabi) pawh hna ṭan vat a nih theih nan hma la tur leh, NH-44A/108 kawng awmsa thawm ṭhatna tur (one time improvement) sum pe vat turin an ngen bawk.

MP Richard Vanlalhmangaiha chuan, Mamit district chu Mizorama Aspirational District awm chhun a nih tghu sawiin, Mamit VC-te'n mamawh an thlente chu ngaih pawimawhsak turin Ajay Tamta a ngen a; Mizoram chu ruahtui tlak tamna hmun a nih avangin tun ṭhál chhung ngeia kawngpui siam a nih theih nan theihtawp chhuah turin a ngen a ni.

Minister Ajay Tamta chuan, Mamit VC-te thu thlente chu chak taka a lo bawhzui tur thu leh theihtawp a chhuah tur thu a sawi a; remchang hmasaah Mizoram leh Mamit district tlawh a tum thu a sawi bawk.

Mamit VC-te chuan, Union Minister an hmuh theihna tura theihtawp chhuahpui a, an mamawh leh duhte a hmun ngeia sawipuitu leh buaipui an ngaihna a pianga buaipuitu MP Richard Vanlalhmangaiha chungah an lawm tak zet thu an sawi a ni.