KHAWTHLIR

All Mizoram Petroleum Dealers' Association (AMPEDA) chuan nimin khan thuchhuah siamin, Silchar Truck Drivers Association intite'n September 12, 2020 zana Lailapur-ah Mizo tank lorry leh a driver leh handyman-te kut an lo thlak chu pawi an tih thu leh an rilru a nat thu an tarlang. An lungawi lohzia lantir nan naktuk Thawhlehni (September 15) hian Mizorama pump zawng zawng an khar dawn tih an puang. AMPEDA chuan, pawi khawihtute chu a rang thei ang bera man a, an phû tâwka hrem ngei an phût tih an sawi bawk. 

KṬP, Durtlang North Branch chuan September 12, Inrinni khan Synod Hospital blood bank-ah thisen unit 20 an pe a, a petute mipa 15 leh hmeichhia panga an ni.

Mizoram sorkar chuan tun hnai khan New Education Policy, 2020 zir chiang a, Mizorama hman tur ‘Programme of Action’ duang tur Group of Expert a din. Group of Expert-ah hian chairman chu Human Resource Development Board vice chairman L Thangmawia, MLA a ni a, member dang mi 11 an awm.

Presbyterian Kohhran, Siaha Pastor Bial chuan Covid-19 donaa hman turin Siaha District Task Force hnenah tun hnai khan Rs. 20,000 an pe. 

Task Group on Quarantine Facilities chhinchhiah danin, September 12, Inrinni thleng khan Mizorama quarantine facility hrang hrangah Covid-19 vanga khung hran mi 1,486 an awm. Khung hran mekte chu in (home)-ah mi 151, hotel-ah mi 31, community quarantine facility-ah mi 18, sorkar quarantine facility-ah mi 1,015 leh isolation facility-ah mi 271 an awm a ni.

Lawngtlai District Road Protection Squad chuan tun hnai khan National Highway-54 kawngpui kama bungraw dah hnawkte an enfiah. NH-54 kawngpui tichêpa in sakna bungraw dah hnawk te, tui luankawr hnawh phui zawnga lung leh rawra dahte leh, kawngpui tichêp zawnga lirthei dahte an enfiah a, bungraw dahtute chu ni sarih chhunga an bungruate lo senghawi vek tura tihna lehkha an pe a ni.