Champhai dist. CD ratio 68.50%

Champhai bawrhsap VL Remliana hoin nimin khan DC conference hall-ah District Consultative Committee, District Level Review Committee leh District Level Security Committee an ṭhu a; thla thum chhunga Champhai district-a bank-te CD ratio chu 68.50% a nih thu tarlan a ni.

Ṭhutkhawmah hian sorkar kum kal meka second quarter July-September, 2024 chhunga Champhai district-a bank hrang hrangte hnathawh dan pawh thlirho a ni. Champhai district-a bank-tea mipuiin pawisa an dah aṭanga bank-in pawisa a pûk chhuahtir zat (CD ratio) chawhrual chu 68.50% a ni a, RBI-in CD ratio atana a bituk 60% an khûm. Thla thum chhungah vêk hian hmun hrang hrangah financial literacy campaign ṭum 36 neih a ni bawk.

Champhai Bawrhsap chuan NABARD Regional Office-in Champhai district tana an buatsaih, 'Potential Linked Credit Plan (PLP) 2025-26' a tlangzarh a; PLP hnuaiah hian loneitute hmasawnna tur te, hmasawnna ruhrel dinna tur leh Micro Small & Medium Enterprise-te tihchakna turin cheng nuai 26,129.69 ruahman a ni.