Lunglei DC-in Krismas thilpek a hlan

Lunglei district bawrh-sap Navneet Mann chuan December 16, Thawhṭanni khan Serkawna Baptist Church of Mizoram (BCM) hmunpui leh home hrang hrang a tlawh a, Krismas thilpek a hlan.

Navneet Mann hian BCM hmunpui bakah, BCM hnuaia hnuchham enkawlna - Baptist Church Orphanage (BCO) leh Baptist Child Resources Centre (BCRC) te, ruihhlo ngai leh rahbi tleute enkawlna MBKHP Chhawmdawlna In te, kum tling lo dan bawhchhiate enkawlna Observation Home leh Special Home-te a tlawh. Thawktute nen an inkâwm a, harsatna leh mamawh an lo thlente bakah, hmasawnna atana thil pawimawhte sawiho a ni.

BCO-ah hian nau hnuchham leh naupang enkawltu mumal nei lo 28 awmin, BCRC-ah fa atana lak theih tur naupang pakhat enkawl mek a ni a; MBKJP Chhawmdawlna Inah ruihhlo ngai leh rahbi tleu chhawmdawl ngai mipa 66 leh hmeichhia 17 an awm mek. Observation Home-ah mipa naupang pahnih an awm a, Special Home-ah mipa naupang 13 an awm mek bawk.