Rilru thar ke pên turin ZPM ṭhalaite chah

ZPM ṭhalaite chuan December 16, Thawhṭanni khan CK Ransam-ah Advance Christmas an hmang a; ZPM Ṭhalai president Jeje Lalpekhlua chuan, kawng engkimah tlo a pawimawh thu sawiin, rilru thar leh tha thar nen ke pên turin ZPM ṭhalaite a chah.

Jeje Lalpekhlua chuan, party dah pawimawh a ngaih thu a sawi a, "Kawng engkimah kan kal zelna turah tlo a pawimawh. Tlo leh nghet takin insawhnghet deuh deuh ila, Pathian zarah kumte a lo thar leh ang a, rilru thar leh tha thar nen ke i pên zel ang u," a ti.

An hun hmanpuitu minister PC Vanlalruata chuan, tuna ṭhalaite chu nakina hruaitu tur an nih thu sawiin, "Ṭhenkhatin politics hi telna tlaka ngai loa hun rei tak an lo hnuchhawn tawh hi siam danglam a, politics-a inhman hi thil zahthlak dawn dawn anga ngaih a ni ṭhin," a ti a; politics chu ṭhalaite tana tel zahna chi a nih lohzia leh thianghlim takin politics kaltlangin ram rawngbawl hna a thawh theihzia lantir turin ZPM ṭhalaite a chah.

Minister of state B Lalchhanzova pawhin thu sawiin, "Keini chu kan danglam bik tur a ni a, mi dangte'n kan party-a awm an châk theihna turin kawng engkimah fimkhur tak leh thianghlim taka kan kal a pawimawh," a ti.

Inkhawmah hian ZPM vice president C Lalnunnema leh MLA Lalmuanpuia Punte ten thu an sawi bawk.