ICT department hmalakna thlirho a ni

Information & Communication Technology (ICT) department hotute chu an minister Dr Vanlalthlana hoin nimin khan Directorate conference hall-ah an ṭhukhawm a, an hmalakna leh hmachhawpte an sawiho.

Dr Vanlalthlana chuan, sorkarin information technology a hman ṭangkai a ṭul thu sawiin, "Sorkar ṭha neih nan khua leh tui thil hria (informed citizen) siam a ngai a, chumi tura IT hmanga sorkarin hmalakna hrang hrang a neih a ṭul. Hei hi tihlawhtling tur chuan ICT department hi sorkar kutke ber kan ni," a ti a, ICT inrawlhna tel lo chuan sorkar chak siam a har tawh thu a sawi.

Ṭhutkhawmah hian ICT informatics officer Vanlalringa'n ICT department hmalakna leh hmachhawpte a sawifiah. ICT department-in project an enkawl mekte chak zawka kalpui dan tur te, ICT-in hmachhawp an neih bawhzui dan tur leh, kum thara ICT hmalak theihna tur ruahmanna siam dan turte an sawiho a ni.