Tlawng HEP atana hmalak dan sawifiah; "Kum ngaah intodelh hman ngei kan tum" - Power Minister

Power & Electricity minister F Rodingliana chuan nimin khan Lungleng rama Tlawng kamah thuthar thehdarhtute kâwmin, Tlawng Hydro Electric Project (HEP) khuahna tura ruahmanna leh hmalak dan a sawifiah a, "Kum nga chhungin kawlphethaah intodelh hman ngei kan tum," a ti.

F Rodingliana chuan, solar leh hydel project hmangin kum 5 chhunga intodelh hman tumin theihtawp an chhuah tih sawiin, "Tlawng hi kan ngaih pawimawh ber a ni a, Tuivai, Tuichang leh hmun dangahte pawh hma kan la. Tlawng Central Water Commission (CWC) lamin an buaipui mek a, detailed project report (DPR) siam turin hmalak mek a ni," a ti a, DPR siam zawh a nih veleh sum hmuhna tur an buaipui nghal tur thu a sawi.

Tlawng Hydel Project atan lei verh a ngai dawn lo tih sawiin Minister chuan, "Khuah man a tlawm bakah, a awlsam deuh dawn. Khualzin hîpna atan pawh a ṭangkai dawn a, Multipurpose Dam tur anga kalpui a ni. A tirah megawatt 54 pe chhuak thei tura ruahman a ni a, tunah chuan megawatt 120 pe chhuak thei turin an ruahman. Kawlphetha a siam zawng zawng hi kan chan vek theih kan beisei," a ti.

F Rodingliana chuan, Tuivai, Tuichang leh Tuirini luite pawh khuah ngei an tum avangin an sorkar hlimah Revenue department nen ṭang dunin tuikhuahin a chîm turah LSC leh periodic patta siam theih tawh loh tura an tih vek thu sawiin, "Ṭum dangah chuan tuikhuah a nih dawnin, LSC a pung vak ṭhin. Tunah chuan LSC leh periodic patta neih thar chu dan bawhchhiatna a ni tawh," a ti a, zangnadawmnain mipui rilru a hruai kawi ṭhin tihbo an tum thu a sawi.

Power Minister sawi danin, Tlawng lui khuah turah hian Ministry of Water Resources chuan Tlawng HEP Survey & Investigation thawh nan leh DPR siam nan kum 2014 khan cheng vbc. 11.55 a sanction tawh a, CWC thawh tura tih a ni.

Survey & investigation neih tawha a lan danin Tlawng HEP hi Aizawl bul hnai Lungleng bula siam tura ruahman a ni. Tuikhuah san zawng metre 120 a ni ang a, village council eng emaw zat ram a chîm dawn a, khua leh in a chîm buai dawn lo thung. Tuikhuah hian ram vah loh hectare 2,888 leh ram vah hectare 187 vel chîm tura ngaih a ni a, Ramlaitui/Kawlhawk khaw zawn vel thleng a chîm dawn a; tui million cubic meter 1,009.6 a khawl thei tura ngaih a ni.

CWC-in topographical survey, geotechnical investigation, seismic study, construction material survey-te an ti zo tawh. Tui khuahna tur hmuna foundation study eng emaw chen kalpui tawhin, lei chhungril awm dan zirchianna drifting hna an la hmabak. Hna thawk turin tender koh tawh a ni a, tender evaluation tih mek a ni.

Drifting work zawh a nih veleh design leh cost estimate-te thawh ṭan nghal a ni dawn a, kum 2025 laihâwl velah chuan DPR peih beisei a ni. DPR peih veleh Mizoram sorkarin kut a thlak nghal ang.