National Food Security Day hman a ni

Food, Civil Supplies & Consumer Affairs (FCSCA) department bultumin September 12, Inrinni khan Mizoram hmun hrang hrangah National Food Security Day (NFSD) hman a ni.

National Food Security Day hi Lungleiah chuan DRDA conference hall-ah hun hman niin, DCSO M Misa­el-a'n a kaihruai a; khuallian R Vanrengpuia, additional DC chuan, National Food Security Act (NFSA) chu sorkar laipuiin mi harsa zawkte'n tláwm leh awlsam zawka ei tur an hmuh theihna tur atana a buatsaih a nih thu sawiin, "Ration chanpual tur hi a hun taka sem a nih theih nan leh buhfai ṭha sem a nih theih nan uluk takin Central team-in an vil reng a ni," a ti.

Inkhawma tarlan danin, Lunglei district-ah supply centre 15 a awm a, ration card nei chhungkua 45,075 awmin, AAY chhungkua 4,105, PHH chhungkua 23,168 leh non-NFSA chhungkua 17,802 an ni.

NFSD hi Champhaiah chuan additional DC Mark Lalthanliana hoin IPR auditorium-ah hman a ni. Mark Lalthanliana chuan, Mizorama NFSA hman a nih theihna tura state sorkarin dan a siam 'The Mizoram Food Security Rules, 2015' clause 8-in a tarlan angin, khua/veng tinah selection committee, bialtu DCSO kaihhruaina hnuaiah din vek a nih thu a sawi.

Kolasib-ah chuan NFSD hi VC House-ah hman a ni a; SDC Timothy R Lalhmangaiha'n thu sawiin, India danpuiin khua leh tuite tan chanvo hrang hrang a siam angin NFSA hnuaiah chanvo mi tinin an neih thu a sawi a, "Chanvote chu hamṭhatna dawngtu mipuite'n kan hriat chian a ngai a, chanvo pe chhuak tura mawhphurhna kengtute phei chuan kan tih tur leh tih loh turah kan chian hle a ngai," a ti.

Kolasib district-ah hian FCSCA hnuaiah supply centre pariat, retailer 75 leh ration card nei chhungkaw 53,048 an awm. Ration card nei zinga chhungkaw 2,347 chu AAY an ni.

Serchhipah chuan DC conference hall-ah hman a ni a; bawrhsap Kumar Abhishek chuan, NFSA chu India khua leh tuite chhuanchham leh rilṭáma an awm lohna tura hmalakna a nih thu sawiin, "Nau piang hlim aṭanga kan dam chhung zawng ei tur tlâkchham hlauhthawnawm loha min nuntir hi he danin a tum ber a ni," a ti. 

Serchhip DCSO C Zadailova chuan, Serchhip district chu Aizawl tih loha digital weighbridge nei awm chhun a nih thu a sawi.

Lawngtlaiah chuan SDO (Sadar) V Lalruatliana hoin DC conference hall-ah NFSD hman a ni. V Lalruatliana chuan, mi harsa zawkte'n buhfai a man tláwma an lâk theihna tur leh ṭâm laka mi rethei ber pawh an him theihna tura sorkarin NFSA a duang chu thil lawmawm tak a nih thu a sawi.

Lawngtlai DCSO B Liansiama sawi danin, Lawngtlai district-ah hian FCI kudam pakhat leh FCSCA hnuaiah distribution centre pasarih a awm a, retailer 107 leh ration card nei mi 19,252 an awm. Ration card hi AAY 2,289, PHH 8,326 leh non-NFSA 8,637 a ni.

NFSD hi Mamitah chuan DC conference hall-ah hman a ni a, additional DC Vanlalsawta'n a hmanpui. Vanlalsawta chuan, sorkar aṭanga ration-te chu bothlau leh pelhé awm loa a dawng tur dik takte'n an dawn theih nan hmalak a ni a, chuta tan chuan a enkawltu department leh retailer-te chu mi dang tana thawk an ni tih inhre thar turin a chah. Mamit district-ah ration card - AAY 1,878 leh PHH 9,352 a awm mek a ni.

Mizoram chhungah NFSA hnuaiah hamṭhatna dawngtu chhungkua 6,89,439 an awm a, chu'ngte chu PHH-ah mi 6,13,481 leh AAY-ah mi 75,958 an ni. NFSA atan hian Ministry of Consumer Affairs, Food & Public Distribution aṭangin thla tin buhfai metric ton 5,479.33 dawn a ni ṭhin.