Sorkar inrêlbawlna fel loh vangin Covid-19 vei an pung - Congress party

Mizoram Pradesh Congress Committee (MPCC) chuan thu­chhuah siamin, sorkar inrêlbâwlna fel lo lutuk vangin Mizoramah Covid-­19 hripui vei an pung chak niin an tarlang.

MPCC chuan, tualchhunga hripui inkai darhna (com­munity spread) a thleng tawh tih tarlangin, "MNF sorkar lai kher khera Covid-19 a lêng hi a pawi zual em em a ni. Hripuiin thla ruk dáwn lai min chênchilh chhungin RT-PCR khawl dah theihna tur BSL-3 laboratory pakhat pawh MNF sorkarin an sual chhuak thei lo. State Referral Hospital kianga researcher pakhatin BSL-3 laboratory atana a sak lai hawh chawpin, RT-PCR khawl pawh mi thilphalte ta hawh chawp hmangin thla ruk dáwn lai kan khawsa tawh a ni," an ti.

Covid-19 dona kawngah Mizoram sorkarin thutlukna mumal lo, darkar 24 pawh a ral hmaa sût leh nghal ngai vawi tam tak a siam tawh tih sawiin MPCC chuan, "Thuneihna âtchilha inthlan an buatsaih luih tlat avangin community spread a thlen phah ta hial. Sorkar chak lo, Mizoram tana chhiatna thlentu lo ni tawh ṭhin MNF sorkar kan hrawn lai khera Covid-19 hripui léng hi Mizoram mipui kan vanduai zual hleah kan ngai," an ti. Hemi rual hian, mipuite chu local/village task force thu ṭha taka zâwm chunga hripui laka fimkhur lehzual turin an ngen a ni.