Bána Kaih hnuaia loan pekna atan sorkar leh bank-te'n inremna an ziak

Bána Kaih (Handholding) Scheme hnuaia hamṭhatna dawng tur (progress partner)-te hnena loan pekna atan nimin khan CMO conference hall-ah Mizoram sorkar leh bank pathumte'n Memorandum of Agreement an ziak a; chief minister Lalduhoma'n hmanpuiin, Chief Minister's Bâna Kaih Innovation Challenge a hawng nghal.

Chief Minister chuan, Bâna Kaih scheme chu a takin an kalpui dawn ta tih a sawi a, "Bank-te nena thawh dun ngai a nih angin kan thawhpui tur bank-te nena inremna kan ziak thei ta hi kan hlim hle. Mizoram tana ni chhinchhiah tlak, hmasawnna kawng dik min zawhtirtu hmalakna a nih ngei kan beisei," a ti a; inremna ziah zawhah Chief Minister's Bana Kaih Innovation Challenge a hawng.

Mizoram sorkar hian Bâna Kaih scheme kalpuina turah bank pathum - State Bank of India (SBI), Mizoram Rural Bank (MRB) leh Mizoram Cooperative Apex Bank (MCAB)-te inremna thuthlung a ziahpui a ni.

Memorandum of Agreement-ah hian sorkar aiawhin Planning secretary Lalmalsawma Pachuau-in hming a ziak a; SBI aiawhin Regional Business Office, Aizawl regional manager Hubert SZ Khobung, MRB aiawhin chairman Sheryl L Vanchhong leh MCAB aiawhin chief executive officer A Lallungmuana ten hming an ziak. Hriatpuitu atan bank tin aṭangin mi pakhat ṭheuhin hming an ziak bawk.