Mizoram Engineering College-ah kum 2026 aṭangin zirna ṭan tum

Chief minister Lalduhoma hoin nimin khan CMO conference hall-ah minister-te leh sorkar hotute'n Higher & Technical Education hmachhawpte an sawiho a; Mizoram Engineering College, Lunglei Pûkpuiah kum 2026 academic year aṭanga zirna kalpui tura inbuatsaih an rêl.

Ṭhutkhawmah hian National Institute of Technology, Mizoram campus sak meka forest clearance chungchang te, New Education Policy 2020 anga Mizorama state university din dan tur te, a taka Mizoram Engineering College kal thei tura buatsaih dan tur te, Mizoram Polytechnic, Lungleiin harsatna a tawh mekte sawiho a ni.

State university chu kum 2035-a neih hman a ngaih avangin 16th Finance Commission chhungah sum ruahman tum a ni a; Mizoram Engineering College kalpuina tur pawh 16th Finance Commission-ah bawk ruahmanna siam niin, kum 2026 academic year aṭanga class kalpui tuma inbuatsaih ni se, an ti.

Ṭhutkhawmah hian Home minister K Sapdanga, PWD minister Vanlalhlana, HTE minister Dr Vanlalthlana, Power & Electricity minister F Rodingliana, PHE minister Prof. Lalnilawma leh sorkar hotu dangte an tel.