AMC-in Chite lui hnawhtu leivûng paih fai turin ram neitu hriattir an rêl

Aizawl Municipal Corporation (AMC) chuan Republic Vengthlang ram, ITI Veng chhunga leivûng paih ṭhinnaah leivûng leh in sakna bungraw chhiate paih tawh loh tur a nih thu nimin khan a puang a; leivûng paihin Chite lui a thlen avangin luia leivûng lut chu paih fai turin a neitu hriattir an rêl.

Chite luia leivûng lut chungchangah nimin khan Aizawl mayor Lalrinenga Sailo kaihhruaiin executive corporator Lalringliana, AMC commissioner Joseph H Lalramsanga, SDO (Sadar) Srinivas Sadi, sorkar hotu dangte leh Save Chite Lui pawl aiawhte an ṭhukhawm a; Republic Vengthlanga Saiziki rama leivûng paih vanga Chite luia leivung lut hi paih fai turin a neitu hriattirna pek ni se, an ti.

AMC chuan, Aizawl a ṭhan chak avangin leivûng tihchhuah pawh a tam thu leh leivûng paihna hmun tur an zawn reng thu an tarlang a, "Rawtna neite chuan AMC-ah hriattir vat turin kan ngen. Local council zawng zawng hnenah an huam chhunga leivûng paihna hmun zawng tura hriattirna pek a ni," an ti.

Leivûng paihna hmun tur zawng turin AMC chuan Search Team a din a, hmun hrang hrangah an enfiah tawh tih tarlangin AMC chuan, "Phalna (license) pek hmunah chauh leivûng paih theih a ni. Tun dinhmunah leivûng paihna hmun pasarih a awm a, leivung paihnate hi AMC chuan uluk zawkin a vil zui dawn. Dan an bawhchhia a nih chuan na takin hma a la zel dawn a ni," an ti a; Aizawl Smart City-in Khatla huam chhungah leivûng paihna hmun tur an siam mek thu an tarlang bawk.

AMC tarlan danin, AMC leh Aizawl Smart City chuan leivûng leh bawlhhlawh paih rûk ṭhinna hmunah CCTV dah turin an ruahman mek a, dahna hmun tur enfiah a nih tawh.

AMC chuan, dan bawhchhia a mante chu an phû angin an hrem ṭhin nia sawiin, "Mi tu pawhin dan bawhchhia kan hmu a nih chuan rang takin AMC-ah hriattir ṭhin turin kan inngen thar leh a, thlalak emaw, video emaw nen phone number 8575561415-ah whatsapp kaltlangin report tur a ni," an ti.