Mizoramin LDC Excellence Awards a dawng

Mizoram sorkara Power & Electricity department hnuaia Mizoram State Load Despatch Centre (SLDC) chuan Grid India leh Forum of Load Despatcher (FOLD) buatsaih India ram pum intihsiaknaa Emerging LDC category-ah 4th LDC Excellence Awards 2024 lawmman pakhatna a dawng.

Lawmman hlanna hi December 14, 2024 khan Indian Institute of Technology, Indore-a 23rd National Power System Conference-ah buatsaih a ni a; Central Electricity Authority chairman Ghan Shyam Prasad-a'n Mizoram sorkar aiawh Power & Electricity engineer-in-chief H Zonunsanga hnenah lawmman a hlan.

Emerging LDC category-ah hian state/union territory tina load despatch centre-te'n kawlphetha an hmuhte an hman ṭangkai dan te, kawlphetha inlei chhawnna (power market) an hman ṭangkai dan te, state capital tana Islanding Scheme an ruahman dan te, automatic demand management system leh under frequency relays an hman dan te, cyber-security atana invenhimna an neihte leh thawktute hmasawn zelna tur atana training an buatsaih dante bakah, interview leh presentation hmanga intihsiak a ni.

Power & Electricity minister F Rodingliana chuan, award dawn a nih theihna tura rim taka thawktute chungah lawmthu a sawi a; ram leh hnam tan theihtawp chhuah chhunzawm zel turin duhsakna a hlan a ni.