KHAWTHLIR

MLA-in enfiah

Minister of state B Lalchhanzova chuan December 17, Thawhlehni zing khan a bial Aizawl East II-a Tuithiang Vengah kawng chhia thawm ṭhat ngai lai te, Chhinga Veng leh Sihlui inkar (bazar road) leh Sihlui leh Lalat Bridge inkar (via Tuithiang Venglai) kawng thawm ṭhat ngaite a enfiah. Minister chuan, kuminah fûr ruahtui a tam avangin kawng chhia a tam thu leh kawng thawm ṭhat ngai a tam thu sawiin, kawng thawm ṭhat hna sorkarin a thawh mek zel thu a sawi.

Lunglei Sobji Bazar

Lunglei additional DC James Miahlung hoin nimin khan a pisaah sorkar hotu te, khawtlang hruaitute leh sumdawng pawl aiawhte'n Krismas leh kum thar vuakvêta Lunglei Sobji Bazar panna kawnga lirthei leh mipui kea kalte dîpdâl zawnga thil zuar inpho an awm loh nana hmalak dan tur an rel. Thupek ding lai zawm a nih leh nih loh endikin hun remchangah joint inspection neih ni se, an ti.

CSR Cell ṭhu

Mizoram CSR Cell chu an chiarman TBC Lalvenchhunga, MLA kaihhruaiin nimin khan a pisaah an ṭhukhawm a, hmalak tawhna leh hmachhawpte an sawiho. CSR fund dil thei registration nei society, sorkar agency, department-te leh CSR fund pe ṭhin corporate aiawhte inthlun zawmna tur online CSR matchmaking platform peih ṭêp tawh a nih thu tarlan a ni.

Bahhnukte Charity

Officers' Club Lawngtlai chuan mi harsate tana Krismas pual 'Bahhnukte Charity' kaltlanga an thawh khawm Rs 1,23,000 chu nimin khan Central Young Lai Association (CYLA) hruaitute hnenah a mamawhtute hnena pek turin an hlan.

Ar vulh training

Kolasib-a ICAR - Research Complex for NEH Region leh Krishi Vigyan Kendra (KVK), Lengpui ṭang dun chuan nimin khan Lengpui Village Council hall-ah ar vulhtu mi 50-te tan ar vulh leh enkawl dan zirhona an buatsaih. Training-a telte hnenah artê, ar chaw pekna, tui pekna hmanrua leh ar enkawlna tur damdawi chi hrang hrang an sem nghal a ni.

Minister-in hmanpui

Aizawl North-II bialtu MLA Dr Vanlalthlana, minister chuan nimin khan a bial chhunga Ramthar Veng ZPM Unit-III ten Krismas thil pek atana luanchhuahna hun an buatsaih a hmanpui. He hunah hian Dr Vanlalthlana leh AMC Ward-III corporator C Lalchhandami ten thu an sawi. ZPM Ramthar Unit-III hian buhfai (Arham) ip 65 an sem a ni.

Pûkzíng haw rûnpui

Pûkzíng khua chuan December 16-17, 2024 khan an khawchhuak hmun hrang hranga awmte haw rûnpui an buatsaih a, bialtu (Dampa) MLA Lalrintluanga Sailo-in a hmanpui. MLA hian Pukzing community hall leh solar pumping a hawng nghal. Pûkzing hi kum 1807-ah din a ni a, tunah in 117 a awm mek a, mi 450 vel an cheng mek a ni.

Thawh dunna thuthlung ziak

Mizoram sorkara Directorate of Hospital and Medical Education leh ECHO India te chuan nimin khan DHME Auditorium-ah thawh dunna thuthlung, memorandum of understanding an ziak. MoU-ah hian Hospital and Medical Education aiawhin director Dr Lalthlengliani'n hming a ziak a, Dr Robert L Khawlhring leh ECHO India executive May Zodinsangi ten an ṭawiawm. ECHO India aṭanga hming ziaktute chu vice president Dr Sandeep Bhalla, general manager Paromita Das leh manager Dr Purnima Parashar te an ni.