Jail táng pahnih tlanbo

Champhai District Jail-a táng Vansuieni (36), Tahan C, Myanmar leh Lalchhanmawii (44), Khawmawi, Myanmar-te chu nimin zing dar 2 vel khan jail aṭangin an tlan chhuak a, an tlanbo zui.

Vansuieni leh Lalchhanmawii hi heroin vanga man ve ve an ni a, court-in an thubuai a ngaihtuah lai an ni. Nimin zing khawvar hma, dar 2 vel khan jail bang hungna tichhiain an chhuak a; Champhai Police Station-ah thubuai ziah luh niin, zawn zui mek a ni.

Lalchhanmawii hi Women Central Jail, Aizawlah a táng ṭhin a, November 30, 2023 khan a tlan chhuak. Champhai Police-te'n May 11, 2024 khan Champhaiah an man a, Champhai District Jail-ah dah a ni.