Larsap-in Mizoramah oil palm chìn tam a duh

Governor Dr Hari Babu Kambhampati chuan nimin khan Raj Bhavan-ah Indian Council of Agricultural Research - Indian Institute of Oil Palm Research (ICAR-IIOPR), Andra Pradesh hotute a kâwm. Mizoram chu hmarchhak state zinga oil palm chìn tamna ber a nih mek thu leh chìn theihna hmun hectare 60,000-70,000 vela zau a awm thu tarlan a ni.

Dr Hari Babu Kambhampati chuan, agriculture ram ni chungin India chu hriak ei chi (edible oil)-ah a intodelh loh thu leh mamawh tam zawk ram dang aṭanga lak luh a nih thu a sawi a, "He harsatna chingfel tur hian sorkarin theihtawp a chhuah mek a, oil palm thar theihna ṭha tak nei Mizoramah theihtawp chhuaha hmalak a ṭul," a ti a; ICAR-IIOPR hotute chu oil palm chíngtute harsatna leh mamawhte ngun zawka ngaihven turin a chah.

Kolasib-a ICAR Research Complex for NEH Region, Mizoram Centre kaltlanga chak zawka hmalak a nih theih nan ṭan la turin Larsap chuan ICAR-IIOPR hotute a chah a, "Mizoram hi India rama oil palm thar chhuah tamna ber ni thei turin ṭan la ang che u," a ti.

ICAR-IIOPR hotute chuan Mizorama hma an lak tawh dante Governor an hrilh a; Mizoram chu hmarchhak state zinga oil palm chìn tamna ber a nih mek thu leh chìn theihna (potential area) hectare 60,000-70,000 vela zau a awm thu an sawi.

Inkawmnaah hian ICAR-IIOPR aṭangin principal scientist Dr K Manorama leh Dr G Ravichandran leh, senior scientist Dr G Somasundaran te an tel a ni.