Kuminah Champhai dist-ah kuhva ip 9,201 man

Champhai District Crime Review Meeting, 2024 chu December 17, Thawhlehni khan SP conference hall-ah an ṭhukhawm a; kumin January 1 aṭanga December 16 thleng khan Champhai district-ah kuhva rah ip 9,201 man a ni a, Rs 89,690,300 hû a nih thu an tarlang.

Crime Review Meeting-ah hian January 1 - December 16, 2023 leh January 1 - December 16, 2024 chhunga Champhai district-a thubuai ziah luhte khaikhina thlirho a ni a; kuminah January 1 - December 16 thlengin Champhai district-ah Rs 89,690,300 hû kuhva rah ip 9,201 (kg. 6,52,790) man a nih thu tarlan a ni.

Champhai district-ah hian kumin January 1 - December 16 chhungin zu khapna MLP Act hnuaiah thubuai 26 ziah luh niin, Rs 8,685,000 hû zu leh a kaihhnawih thil man a ni a; NDPS Act hnuaiah thubuai 172 ziah luh a ni. Traffic dan bawhchhia mi 663 leh lirthei 690 man a ni bawk a, sum chawi tlingkhawm chu Rs 7,69,200 a ni.

Ṭhutkhawmah hian Krismas leh kum thar lo thleng tura inbuatsaihnate sawiho nghal a ni. Hunpui laia venhimna kalpui turin Champhai khawpui chu gazetted officer-te vil turin zone hnihah ṭhen a ni a, zone-te chu sector 20-ah ṭhen leh niin, sector officer leh thawktu dangte'n an vil ang.

Sorkarin a khap hâlpuah leh hâlmawi hâl te, silai lem mu nei chi hman te, kum tling loa lirthei khalh leh ruihhlo tih vanga mi dang tana harsatna siam thei thilte uluk lehzuala vil an rêl a ni.