Veng fai inelna lawmman sem

Hnahthiala District Urban Development Office (DUDO), Hnahthial Town Sanitation Task Force leh YMA Sub-Headquarters ten Hnahthial khawpui chhunga veng fai inelna an buatsaihah nimin khan Hnahthial DC Meeting Hall-ah lawmman sem a ni a; veng fai ver chu Chanmari Veng a ni.

Hnahthial veng fai bera thlan Chanmari Veng hian lawmmanah Rs 30,000 an dawng a; pahnihna Model Vengin Rs 20,000 leh pathumna Lungleng Vengin Rs 10,000 an dawng. YMA branch dang paruk - Electric Veng, Electric Veng North, Bazar Veng, Kanaan Veng, Venglai leh Peniel Veng te hnenah participation prize Rs 5,000 ṭheuh hlan a ni bawk.

Lawmman hlantu Hnahthial bawrhsap Rita Lalnunmawii Pachuau chuan, "Faina a ni emaw, eng kawngah pawh sorkarin ṭhahnemngai takin ṭan la viau ṭhin mah se, a veng neitu tak takte'n hma an lak loh chuan hmasawnna a awm tak tak thei ṭhin lo," a ti a; veng tinte chu faina lama ṭan la zui zel turin a chah.

Hnahthial DC chuan, faina pawimawhna chu inhrilh nawn fo a ngaih thu sawiin, "A bikin naupangte hnenah inzirtir uluk a ṭul. Fai hi naupan lai aṭanga intuh ṭan a ṭul a, theihtawpin naupangte hnenah zirtir a, an entawn tlak tura fai a ṭul a ni," a ti.