ZPM Ṭhalaiin kalphung thar a awmah ngai

ZPM Ṭhalai chuan thuchhuah siamin, chief minister Lalduhoma leh a kaihhruai ZPM sorkar hnuaiah kalphung thar a awm zel thu leh, kum khat chhungin Mizoramah administrative reform leh mipui moral reform tam tak thlentir hman a ni chu lawmawm an tih thu an tarlang.

ZPM ṭhalaite chuan, "Thawhrimna leh dikna hmanga hmasawnna duhawm tak Pu Lalduhoma leh a kaihhruai ZPM, mipui sorkar hian Mizo mipuite min thlenpui ngei kan beisei tlat a ni. Mizo mipui tan sorkarin kum khat chhung leka bill 46 siama a pass theihnate hian ZPM mipui sorkar hi sorkar chak tak leh chhuanawm tak a nihzia a lantirah kan ngai," an ti.

Kalphung thar, mipui sorkarah sorkar hnathawkte thla a muang nia sawiin ZPM Ṭhalai chuan, "Sorkar hmasa lama dearness allowance an tihpun an pek theih tawh loh pawh sorkar tharin a pe thei hi a lawmawm kan ti,: an ti a; sorkar hmasa hun laia DA chungchang leh hlawh pek theih loh vanga sorkar hnathawk inzawmkhawm pawlte'n sorkar an nawr ṭhin ang kha tunah chuan a awm tawh loh thu an tarlang.

ZPM Ṭhalai chuan, sorkar hmasain kum 5 chhunga sorkar hnathawk pension case 974 chauh an tihfel theih laiin, ZPM sorkarin kum khat chhungin 7,237 a chingfel hman niin an sawi a, "Sorkar hnathawk mek leh pensioner-te tan pawha nu leh pa nih tling sorkar a nihzia a lang," an ti.

ZPM kaihhruai sorkarin hmeithai, rualbanlote leh kum upate tana hamṭhatna pek ṭhin pawh Rs 100 aṭangin Rs 1,000-ah a tihsan thu an tarlang bawk.