Covid-19 laka himna atana Hmalak zel dan tur sawiho
Hnahthial District Task Force on Covid-19 chu September 11, Zirtawpni tlai khan an chairman Vanlalmawia, bawrhsap hoin a quar-ter-ah an ṭhukhawm a, Covid-19 darh mekah mipui himna tur hmalak zel dan tur an sawiho.
Vanlalmawia chuan, Covid-19 in Mizoram min luhchhuah mek avangin mi tin an inrálrin a ṭul zual tih a sawi a, "Kan district mipui pawh kan fimkhur thar zel a ṭul a, ruahmanna ṭha tak nena hmachhawn a pawimawh. Covid-19 hian Mizoram min chênchilh tawh avangin mipui vantlangah darh huk thei a ni a, sorkar ruahmanna zâwma fimkhur a ṭul," a ti.
Meeting-a tarlan danin, Hnahthial district-ah hian state páwn aṭanga haw mi 263 chu khung hran an ni a, mi 236 chu an hun hmang zoin chhuahtir ni tawhin, mi 27 khung hran an la ni mek. An district mi 248-te swab sample ZMC-ah endik a ni tawh a, hripui vei mi pahnih hmuh chhuah a ni a, CCC-ah enkawl mek an ni.
Meeting-a thurelte
. Sûlhnu chhui a awlsam leh chak zawk nan mahni veng/khuaa lut leh chhuakte chhinchhiah ni se.
. Mahni veng/khua aṭanga loh theih loh vanga zin chhuakte chu sorkar Standard Operating Procedure (SOP) zâwm ngei tura hriattir ṭhin ni se.
. Bungraw chah leh lak luhte pawh SOP-in a sawi anga lak leh dawnsawn a nih theih nan mahni huam chhungah hmalak ṭheuh ni se.
. Lockdown/partial lockdown tih loh theih loh a awm chuan District Magistrate (DC) hriattir hmasak ṭhin tur.
. Sûlhnu chhui ngai a awm chuan contact tracing-a medical incharge Dr R Lalsanglura, medical officer (Ph. 9862327400) leh SDPO Bijoy Gurung (Ph. 9612328381) hnenah rang taka hriattir ni se.
. Mahni khua/venga sumdawng leh dawrkaite chu anmahni dawrtu chhinchhiahna fel tak neihtir tur a ni.
. Covid-19 hi mipui vantlangah darh huk thei reng a nih avangin mahni huam chhungah sorkar ruahmannate zâwm tur leh hmai tuam, kut silfai leh social distancing-te nunpui turin mipui hrilh tam ni se.