Lawngtlai DC-in Eri cut cocoon a vailiam

Lawngtlai district bawrhsap Cheemala Siva Gopal Reddy chuan nimin khan District Sericulture Office bultumin Lawngtlai district-a Eri Silk pangang aṭanga buhchiûm lak chhuah tawhna 'Eri cut cocoon' a vailiam a, Aizawl aṭanga phai lama hralh tur a ni.

Bawrhsap chuan, Sericulture department hmalaknaa hun rei lo te chhunga kut hnathawktute'n sum lak luhna ṭha tak an nei thei chu lawmawm a tih thu a sawi a, "Lawngtlai district hi Mizoram mai ni lo, India ram thleng pawha silk cocoon thar tam ber ni thei turin ṭan la ang che u," a ti a, department hmalakna hrang hrangah puih a inhuam thu a sawi.

Lawngtlai district sericulture officer Lalrammawia chuan, kumina cocoon an tharte chu Aizawla Sericulture Directorate-ah an thawn phawt dawn thu leh Aizawl aṭangin phai lamah an hralh leh dawn thu a sawi a, "Kumin hi bul kan ṭan kum a ni chunga cocoon quintal 3 chuang leh buhchiûm quintal 20 chuang kan thar thei hi thil lawmawm tak a ni," a ti a; silk cocoon leh buhchiûm an thar zawng zawng chu Rs 13,00,000 chuang hû a nih thu a sawi.