Hâlpuah/hâlmawi vanga mante thubuai siamsak zel a ni dawn; Video-a thla latu tur indah a ni dawn

Home minister K Sapdanga hoin nimin khan a pisaah Central YMA, kohhran ṭhalaite leh sorkar official-te'n hâlpuah leh hâlmawi khap chungchang an sawiho. Halpuah/halmawi hâl a awm chuan video-in thla lak a ni ang a, zan lama kawngka leh gate kalh vanga man theih lohte chu a tûkah man zel an ni dawn a; mi mante chu thubuai siamsak zel an nih dawn thu tarlan a ni.

Home Minister chuan, halpuah leh halmawi chu ṭangkaina nei lo, a rah chhuah ṭha awm lo a nih avangin dan hmang leh ngenna hmanga khap an rêl thu a sawi a, "Ngenna chu YMA leh kohhranin an siam a, theihtawp an chhuah. CYMA chuan city branch-te ko khawmin, a hlauhawm dante an inhrilhfiah a, ṭhahnemngai takin an bawhzui mek zel," a ti.

Kohhran lam pawhin halpuah leh halmawi ṭhat lohzia an puanzar mek thu sawiin K Sapdanga chuan, "Kohhran lamin theihtawp an chhuah mek chungin, ṭhalai lamin rawtna in neihte leh kan kalphunga ṭha tawk lo tih in neihte kan hre duh a, chuvangin inhmuhkhawmna hi buatsaih a ni," a ti a, halpuah leh halmawi khap a hlawhtlin theihna atana thawhpuiah a sawm.

CYMA aiawh assistant secretary Fabian Lalfakawma chuan, CYMA chu halpuah leh halmawi khapa a beidawn hman avangin, sorkarin a tum tak tak leh tak tak loh ngaihchân hial tura an rêl hman thu a sawi a, "Tuna kan Home Minister hian a tum tak tak tih kan hriat avangin kan phûr hle. Theihtawp kan chhuah mek a, kan chhuah zel dawn," a ti.

Kohhran hrang hrang ṭhalai hruaitu kal khawmte chuan, sorkarin halpuah leh halmawi a khap chu ṭha an ti tlâng a, an theihna zawnah theihtawp chhuah an tum thu an sawi.

Police hotute sawi danin, halpuah leh halmawi vanga man thubuai an siamsak tawhte chuan an sim tlangpui a, kuminah pawh man an awm chuan thubuai siamsak zel an ni dawn.

Ṭhutkhawmnaah hian official aṭangin Home secretary Vanlalmawia, DIG Lalbiakthanga Pachuau, Aizawl DC Lalhriatpuia, Aizawl SP Rex Zarzoliana Vanchhawng leh official dangte an tel. Halpuah leh halmawi khapna hlawhtling ngei se an duh a, a hlawhtlin theihna atan ṭhahnemngai leh lungrual taka thawhho zel ni se, an ti.

ṬHUTKHAWMA SAWI ṬHENKHAT

☑ Halpuah leh halmawi hâl lai video thawnna tur siam a ni dawn.

☑ District tinah patrolling unit siam tura tih a ni a, DSP chin zonal officer an ni ang.

☑ Police-te'n JAC leh YMA duty-te an thawhpui ang.

☑ Patrolling unit tinah video hmanga thla la tur pakhat zel telh a ni dawn.

☑ Halpuah leh halmawi hâlna in, zana an kawngka leh gate kalh vanga man theih lohte chu a tûkah man an ni ang.

☑ Kum hlui thlah zanah chuan DIG hoin khawlai fan kual tur a ni.

☑ Police leh YMA ṭang dunin halpuah leh halmawi dap rûnpui neih a ni dawn.