Lunglei HPC ṭhiah tumna a awma sawi Lungleia NGO-te'n an dodal

Lungleia pawl (NGO) hrang hrangte chuan Lunglei District High Powered Committee (HPC) ṭhiat tura hmalakna rêng rêng a tàwp thlenga dodâl zel an tum thu an puang.

Lungleia pawl hrang hrangte intêl khawmna, NGO Coordination Committee, Lunglei chuan Lunglei HPC chu vawiina Cabinet Meeting neih turah ṭhiat tura rawtna agenda a awm nia an hriat avangin nimin khan emergency meeting neiin an ṭhukhawm a ni.

Lunglei NGOCC chuan, Lunglei High Powered Committee ṭhiat tura rawtna Cabinet Meeting agenda-a awm chu hnûk kîr turin an ngen tih an tarlang a, "NGO Coordination Committee, Lunglei chuan HPC ṭhiat tura hmalakna rêng rêng chu a tàwp thlenga dodal zel kan tum," an ti.

NGO Coordination Committee ngenna chu zahsak turin Mizoram sorkara minister-te an ngen a; "Kan Chief Minister, Chairman, High Powered Committee, Lunglei ni bawk hoa ni 19.8.2024-a an lo rêl tawh angin High Powered Committee, Lunglei hi legislate tura hma min laksak zawk turin kan ngen a ni," an ti bawk.