Buhfai man tihsan hnuah sorkarin thla tin cheng nuai 384 vel a hum
Chief minister Lalduhoma hoin nimin khan Secretariat conference hall-ah minister of state B Lalchhanzova enkawl - Food, Civil Supplies & Consumer Affairs department leh Land Revenue & Settlement department-te kum khat chhunga hnathawh dan thlirho a ni. Ration card var neite tana buhfai man tihsan aṭangin sorkarin thla tin cheng nuai 384 vel a hum theih thu an sawi.
CM Lalduhoma chuan, review meeting chu department harsatna leh mamawh chungchang bakah, chak leh ṭha zawka hna thawh theih dan tura inrâwnkhawmna a nih thu a sawi a, "FCSCA department leh LRS department hnate hi a hautak a, an pawimawh si a, thawktute pawh inpe taka thawk turin kan beisei che u a ni," a ti.
Review meeting minute bawhzui dan an ngaihven leh dawn avangin an thil sawihote chu ṭha tak bawhzui turin CM chuan department hotute a chah a, "FCSCA lam hian ration card dik leh rintlak tak neih lo tum u la, sorkar document pawimawh takah chantir kan duh," a ti a; hun rei tak FCI-in a bat tawh Hill State Transport subsidy cheng vbc 26 chu a theih ang anga a bawhzui tur thu a sawi.
Chief Minister chuan, lirthei khû endikna (pollution test-na) chu petrol pump tinah dah theih a nih leh nih loh te, pump hrang hrang inhman ṭâwm theih coupon system duan theih dan dap turtein FCSCA hotute a chah bawk.
Minister B Lalchhanzova chuan, kum khat chhunga a department enkawlte hmalakna lian zual a tarlang a; FCSCA director Saizikpuii'n an department hnathawh dan a sawifiah a, ration card var neite tan buhfai man tihsan a nih hnuah sorkarin thla tin cheng vbc 3.84 (nuai 384) vel a hum theih thu a sawi.
FCSCA hotute tarlan danin, Serchhip khawpuia veng tinah gas home delivery ṭha taka kalpui a nih tawh thu te, district khawpui dangah pawh kalpui a nih tawh thu leh Aizawla veng 29-ah kalpui tawh niin, veng 53 dangah a ṭhen laiah kalpui tawh a ni. Aizawla LPG distributor-te'n kum thar aṭangin veng pahnihah home delivery an kalpui belh leh vek dawn a, Zothan Indane chuan an huam chhungah home delivery an kalpui vek tawh.
Thlirletnaah hian inhnaih tak taka kudam tam lutuk tihtlem te, permanent fair price shop sak te, buhfai bûk dik tak mipuiin an dawn theihna tura ruahmanna siam mek te, weighbridge tlo zawk neih theih dan tur te, thawktute awmze nei zawka sem rual chungchangte sawi a ni.
Ṭhutkhawmah hian adviser to CM TBC Lalvenchhunga, CM secretary Vanlaldina Fanai, Finance additional secretary Ramchuana te, department pahnih leh CMO official dangte pawh an tel a ni.
ṬHUTKHAWMA TARLAN DANGTE
☑ Monsoon stock ṭha taka kalpui a nih avangin kuminah ruahtui tla tam mah se buaina a thleng lo a; 2025 monsoon stock tur January thla aṭanga kalpui ṭan tur a ni.
☑ Buhfai phurtu contractor - main route-ah 55 leh district route-ah 108 an awm mek.
☑ Buhfai phurh man atan main route-ah April-December, 2024 chhungin cheng nuai 2,503.75 leh district route-ah nuai 2,047.10 sèn a ni tawh.
☑ NFSA buhfai phurh nan sorkar laipuiin quintal khatah Rs 105 zel a tum.