Minister-te'n tui lâkna thar an tlawh

Urban Development & Poverty Alleviation (UDPA) minister K Sapdanga leh Public Health Engineering (PHE) minister Prof. Lalnilawma te chuan nimin khan State Investment Programme Management & Implementation Unit (SIPMIU) hnuaia Setlak, Tanhrila Aizawl tui lâkna siam thar, 37 MLD Water Treatment Plant an tlawh.

37 MLD Water Treatment Plant hi Greater Aizawl Water Supply Phase I & II khuahna, Reiek kai aṭanga Tlawng lui mawng lam km. 8-a hlá, Tanhril ramah siam a ni a; ni khatah darkar 23 hna thawk thei tur leh ni khatah Laipuitlanga tuizem lianah tui litre maktaduai 37 pump thei tura duan a ni.

K Sapdanga chuan, tui chu mi tin mamawh leh mihring hriselna thui tak innghahna a nih avangin PHE department kaltlangin mipuiin tui thianghlim leh hnianghnar an dawn a pawimawh thu a sawi a, "Chutihrual chuan tui renchem nachang inzirtir tel a ṭul," a ti a; Aizawl khawpuiin tui thianghlim a mamawhna sang zel phuhru turin 37 MLD Water Treatment Plant siam a nih thu a sawi.

Prof. Lalnilawma pawhin thu sawiin, "Kumin fûrah ruahtui tlâk a tam avangin Tlawng tui lianin Water Treatment Plant-a tui hìp luhna ‘intake well motor' a chîm chhiat chu siamṭhat a ni tawh a, enchhin turin naktuk (December 20) hian ‘No Load Test’ kalpui a ni ang," a ti.

Leimin leh lei tlahniam vanga pipe chhia leh tui pût awm theihna hmun endik hna kalpui mek a nih thu sawiin PHE Minister chuan, tui pump hna kalpui chhunzawm leh thuai a nih theih nan thawktute chu ṭha taka hna thawk turin a chah.

Minister-te hi PHE secretary Lalrinkima Hnamte, engineer-in-chief Lalrothanga, joint secretary Zarzokimi, chief engineer Zodinthari bakah, UDPA leh PHE department-a thawktute'n an ṭawiawm.

37 MLD Water Treatment Plant hi kum 2016-ah siam ṭan a ni a; India ram khawpui liana chengte'n ni tina tui an dawn ṭhin ang, mi pakhat tan litre 135 chu Aizawlah sem theih tura ruahman niin, kum 2033 thleng Aizawl mipui 4,45,000 châwm zo tura duan a ni.