Kháwl hmanga âlu tharna hmun hawng

Agriculture & Farmers Welfare minister PC Vanlalruata chuan nimin khan Thingdawl Agriculture Farm-ah lei (soil) tel loa alu tharna khawl, Aeroponic System of Potato Seed Production leh Tissue Culture Laboratory building a hawng.

Aeroponic System of Potato Seed Production hmang hian kum khatah alu chi (mini tuber) 2,50,000 thar theih beisei a ni a, kum khata season hnih an kalpui thei a nih chuan 5,00,000 thar tura beisei a ni. Production Unit atan North Eastern Council aṭangin cheng nuai 198 hmuh a ni a, contractor chu Blue Stallion Equipment, Ludhiana a ni.

Aeroponic system-ah hian alu (plant) chu tissue culture lab-ah daha sâwngbâwl a nih hnuah Aeroponic Production Unit-ah lak a ni ang a, chutah chuan alu chi ṭiakin, a zung (root) a siam chu lei si loin an khai dawn a ni. Lei (soil) hmang loin tui leh alu-in a mamawh tur chaw ṭhate khawl hmangin phuh ṭhin a ni dawn.

PC Vanlalruata chuan, Aeroponic System of Potato Seed Production chu Agriculture department tana rahbi ropui a nih thu a sawi a, "Khawl leh hmunhmate peih ni mah se, thawktute'n an enkawl ṭhat loh chuan tum angin hlawhtlinna kan hmu lo ang; thawktute'n in vei a ngai a ni," a ti.

Assembly deputy speaker Lalfamkima pawhin thu sawiin, "Mizoramah project ṭha tak tak hawn a ni tawh ṭhin a, a nihna tur anga enkawl zui a nih loh avangin zuih ral ta a awm nual. Sorkar hnathawkte'n ram hmangaihna rilru puin sorkarin a dahna hmunah lungawi taka awm a pawimawh," a ti a; inpekna rilru nen sorkar hnathawkte'n hna an thawh a ṭul thu a sawi.