Mizorama thar buh hûm sorkarin a lei ṭan

Mizoram sorkar chuan nimin khan Pangbalkawn, Kolasib district aṭangin buh hûm kg. khat Rs 30-in a lei ṭan. Agriculture Minister chuan, sorkarin buh hûm a leite chu buh déngkhawla her fai hnuah mipui hnenah ration buhfai atan pek chhuah tur a nih thu a sawi.

Buh hûm lei ṭanna hun hi nimin khan Om Om Modern Rice Mill, Pangbalkawnah Agriculture and Farmers’ Welfare minister PC Vanlalruata leh Assembly deputy speaker Lalfamkima hoin hman a ni a; nimin bikah chuan buh hûm quintal 418 lei a ni.

Agriculture Minister chuan, "Kalphung thar mipui sorkar kháwlpui kan herh nung ṭan mek a, Mizoramah a vawi khat nan kut hnathawktute thar buh hûm Modern Rice Mill, Pangbalkawnah kg khat Rs 30-in sorkarin kan leisak thei ta hi Mizoram tan méllung pawimawh a ni," a ti.

PC Vanlalruata chuan, "Kumin hian Mamit leh Kolasib district aṭangin buh hûm lei phawt tura ruahman a ni. Sorkarin buh hûm a leite hi buh dengkhawlah kan her fai ang a, mipui hnenah ration-a sem chhuah leh vek tur a ni," a ti a; buh hûm lei chu Mizoramah buh thar a pun zel theih nan pilot project anga kalpui a nih thu a sawi.

Sorkarin thlai thlan bik - sawhthing, aieng, hmunphiah leh hmarchaah rate puan sa a neih thu sawiin Minister chuan, "Tun ṭumah hian puan lâwk loh buh hûm kan lei tel thei ta hi kan chief minister Pu Lalduhoma hmalakna liau liau a ni a, kut hnathawktute hmangaihna thinlung aṭanga lo chhuak a ni. Kut hnathawktute hlim hmêl kan hmu hian min tilawm tak zet a, kalphung thar sorkar hi kut hnathawktute tan nghet takin a ding zel dawn a ni," a ti.

Buh hûm lei ṭanna puala inkhawm hi Agriculture and Farmers’ Welfare secretary Lalramdini'n a kaihruai a; khualzahawm Lalfamkima leh Agriculture official-te'n thu an sawi bawk.