Hunpuia tui mamawh ang phuhrûk dan tur PHE Minister hoin sawiho

PHE minister Prof. Lalnilawma chuan nimin khan a pisaah PHE department hotute a kâwm a, Krismas leh kum thar lo thleng turah Aizawl khawpuiin tui a mamawhna zat phuhrûk dan tur a sawipui.

PHE hotute chuan, Aizawlah biak-in 320 chuang awmte'n Krismas leh kum thar chhungin chawhrualin tui litre 30,000 vel ṭheuh an mamawh belh anga chhût a ni a; chuta tana tui mamawh belh chu litre 96,00,000 vel a nih thu an tarlang.

Prof. Lalnilawma chuan, PHE tui pipe phûm danah tun aia ṭha leh fimkhur zawka hna thawh a ṭul thu sawiin, pipe phûm dawnah PWD nen thawhho a ṭul thu a sawi.

Ṭhutkhawmah hian kumin May thlaa Cyclone Remal vanga tui pump-na chhia chungchanga hmalaknate tarlan a ni a; December aṭangin Greater Aizawl Water Supply Scheme (GAWSS) phase I & II chu tluang takin pump theih a ni tawh a, ni khatah tui litre maktaduai 28 an pump chhuak char char tawh.

Hetih lai hian, tun dinhmuna Aizawl khawpuia mipui 3,80,000 vel awm anga chhûtte ni tin tui mamawh chu litre maktaduai 35 a nih avangin, Phase I&II hian Aizawl tui mamawh a pe sêng lo.

Cyclone Remal vanga GAWSS Phase I & III chhia chungchangah, Phase-I bik chu November thla khan siamṭhat a nih tawh thu a, Phase-III siam mek a nih niin, Krismas hma chuan siam zawh theih beisei a ni. Phase-III hi siamṭha hman lo pawh ni se, Krismas leh kum thar laia biak-ina hman tur ang chu November thla aṭangin biak-in hrang hranga tuizemah tlem tlemin an lo dah khawl lâwk tawh.