KHAWTHLIR

Ṭanpuina sem

Siaha Officers’ Club chuan nimin khan Krismas pual ṭanpuina tur an thawh khawm Rs 49,000 an sem. An president H Vabeitha leh senior vice president R Lalnghakliana te hoin hlawm hnihah inṭhenin, Siaha District Hospital, Maraland Gospel Centenary Hospital leh home pasarihah Rs 7,000 ṭheuh an pe a ni.

Computerized registration hawng

AH&Vety deputy director Dr F Lalramhluna chuan nimin khan State Veterinary Polyclinic Hospital, Khatlaah ran entir turte computer hmanga ziah luhna, computerized registration a hawng. Computerized registration software hi Romei Dynamics siam a ni a, veterinary hospital bika Mizorama computerise hmasa ber a ni.

Lirthei 34 man

Mamit district-a police station leh outpost tinte'n December 18-19, 2024 chhungin Mass Vehicle Checking Drive an kalpui a, lirthei 463 an endik zinga 34-in dan an bawhchhia. Dan bawhchhiate chu an dan bawhchhiat azirin pawisa chawitir an ni a, pawisa chawi tling khawm chu Rs 30,000 a ni.

Good Governance

Lunglei leh Mamit district bawrhsapte chuan nimin khan sorkar laipuiin December 19-24, 2024 chhunga kalpui tura a ruahman Good Governance Week (Prashasan Gaon Ki Ore) an hawng.

Governor-in kâwm

Governor Dr Hari Babu Kambhampati chuan nimin khan Raj Bhavan-ah Mizoram Rural Bank chairman Sheryl Vanchhong leh general manager Lallawmzuala Colney te a kâwm a, MRB hmalakna leh harsatnate a sawipui. MRB hian Mizoramah branch 105 an nei mek.