Larsap Lt. Gen Nirbhay hoin Green Mizoram Day hmang

Green Mizoram Day chu nimin khan Mizoram pumah hman a ni a, a hmanna pui ber Aizawl district-ah chuan Hmuifang Tourist Complex-ah Governor Lt. Gen Nirbhay Sharma hoa hun hman a ni a, thupui atan 'I damkhawchhuahna atan thing phun rawh' tih thlan a ni.

Nirbhay Sharma chuan Mizoram chu hringdup angin lang mah se, ramngaw a tam lo tih sawiin, "Mizoramin thing ṭiak phun beihpui hun rei tawh taka aṭanga a lo kalpui hi hmathlir thui tak a neih vang a ni. Mizoram tan mai ni lo ram pum tana hlawkna a ni. Thing ṭiak kan phunte hi an damkhawchhuah ngeina turin uluk taka vil leh enkawl chhoh a ṭul hle a, district dangah pawh an dam chhoh ngeina turin thuneitute pawhin hma an lak a pawimawh," a ti.
Thing phun sponsor uar deuh deuh ṭha a tih thu sawiin Governor chuan, "Thing phun uar deuh deuh a nih theihna kawnga intihphurna atan (incentive) siam a ṭha hle," a ti a, tlangram hlutna chu tipung turin mahni theihna zawn ṭheuha thawh a ngaih thu a sawi.
Thusawitu dang chief minister Lal Thanhawla chuan, "Thing ṭiak phun hi chhuan lo kal leh zel turte tana chenna nuam leh boruak thianghlim kan siamsakna a nih piah lamah, tunlai khawvelin a buaipui ber sik leh sa lo danglam leh boruak lum chho zel siam ṭhatna pawimawh tak a ni. An damkhawchhuahna turin a venhim leh enkawl zui an mamawh tih kan hriat a ṭha," a ti.
Lal Thanhawla chuan thing ṭiak lak leh phun chu a harsat loh thu sawiin, "Kan venhim zui ṭhin loh avangin an dam chhuak lo fo. Chuvangin a enkawl zui hi kan zavai mawh a ni," a ti a; mi pawisak nei lo leh roadside reserve ngai pawimawh loten kangmei tichhuak a, thing phun sa an tichhe ṭhin chu pawi a tih thu a sawi.
Green Mizoram Day puala inkhawm buatsaihah hian kum 2014-15 chhunga kangmei venhim kawnga thawk ṭha district leh khua puala lawmman buatsaihte sem nghal a ni.
District-a pakhatna chu Lawng­tlai district an ni a, Kolasib leh Saiha district chu pahnihna leh pathumna an ni. Aizawl district-a kangmei veng ṭha lawmman pakhatna chu Sailutar-in an dawng a, pahnihna Tlungvel niin pathumna chu Phulpui an ni.
Sorkar thuchhuah tarlan danin, Green Mizoram Day hi kum 1998 aṭanga kalpui ṭan a ni. Kum 1999-2014 chhungin thing ṭiak nuai 36 chuang phun a ni tawh. A hlawhtlin dan hi district hrang hrangte endiknaah Saiha district chuan 81.21% hlawhtlinpuiin, hlawhtlinpui lo ber Champhai district-in 14.68% a hlawhtlinpui a ni.