A thlawna inzirna buatsaih dawn

JobSkills Solutions (Pvt.) Ltd. leh MZP hruai­tute chuan nimin khan Aizawl Press Club-ah thu­thar thehdarhtute kawmin, sorkar laipui ruahmanain a thlawnin skill training buatsaih a nih dawn thu an sawi a, dil turin Mizo ṭhalaite an sawm.

MZP president Lal­hmachhuana chuan JobSkills Solution Pvt. Ltd. chu National Skills Development-in India ram hmun hrang hranga ṭhalaite tana training buatsaih tura an thlan a nih thu sawiin, "Hetianga a thlawna Mizo ṭhalaite tana training buatsaih a ni tur hi phurawm kan ti a, chuvangin kei ni pawhin kan thawhpui a ni," a ti.

Lalhmachhuana sawi danin, a ṭum khatna atan skills development training hi course pahnih banking leh retail-ah neih a ni phawt dawn a, a hlawhtlin dan a zirin course dang hawn belh a ni ang. Training tur hian class X passed a ngai a, a dil duh tan chuan MZP office-ah ngaihven theih a ni.