KHAWTHLIR

NLUP sem
AH & Veterinary department chuan, nimin khan Ngopa leh Kawlkulhah NLUP 2nd phase hnuaia ar vulh thlangtu mi 101 hnenah arte 100 ṭheuh an sem. NLUP hi Ngopa-ah mi 67 leh Kawlkulhah mi 34 hnenah sem a ni.

YMA park hawng
Champhai Zotlang YMA Park chu nimin khan Champhai DFO Vanlalchuailova'n a hawng. He park hi Champhai Zotlang YMA in kum 2008 aṭanga an enkawl a ni a, hectare 81.7-a zau a ni.

MJA Library pe
Lalrokima chuan a lehkhabu ziah 'Chhantei zunzam' tih chu MJA Public Library-ah a pe a, a chungah MJA-in lawmthu sawi a ni.

MHIP-in dem
MHIP gen.hqrs chuan thuchhuah siamin, June 9, 2015 tlaia hmeichhe tleirawl pakhat sikul bâng, a duh lo chung Rangvamuala phur lui leh zu in luihtir tumtu taxi driver Ramnghing­lova (24) s/o Lallianzara, Thanglailung chu an dem thu an puang a; a phû tawka hremna pe ngei turin thuneitute an phût.

St. Paul’s-ah hun hmang
St. Paul’s Higher Secondary School chuan nimin khan an school auditorium-ah investiture ceremony an hmang a, Mizoram Law Commission chairman John Siamkunga, MLA-in a hmanpui. St. Paul’s HSS hian Investiture Ceremony hi kum tin an hmang ṭhin a, naupangte chu hlawm li-ah inṭhenin, kum tluanin intihsiakna chi hrang hrang an nei ṭhin a ni.

Graduation Day
Presbyterian Hindi Bible School chuan Nilaini khan an zirlai batch 55-nate thlahna hun, Graduation Day an hmang. Hindi Bible School hi August 24, 1990-ah din a ni a, kum 2009 aṭang khan Certificate in Theology course hawn a ni.