Synod Bookroom-in conference hmang

Synod Bookroom chuan nimin khan Zosaphluia Building-ah Conference an hmang a, PRESCOM general manager Upa R Lalmalsawma'n a kaihruai. Financial year liam taah khan Synod Bookroom-in Rs. 12,34,01,405 a thawk chhuak tih tarlan a ni.

Synod Bookroom Conference-ah hian kum kal taa branch tiṭhate hnenah senior exe­cutive secretary Rev. Lalzuithanga'n lawmman a hlan a; pakhatna Chanmari Branch, pahnihna Bazar Branch leh pathumna Kolasib Branch-te an ni.

Report-a a lan danin, Synod Bookroom hian kum 2014-15 chhung khan budget Rs. 6,80,00,000 chu Rs. 5,54,01,405-in an khûm a; kum kal ta kha kum 1911-a Synod Bookroom din a nih hnua sum an thawh chhuah tam ber ṭum a ni. Kum 2014-15 chhunga an net profit chu Rs. 57,90,288 a ni. Kum 2015-16 budget chu Rs. 7,82,00,000 a ni thung.

Synod Bookroom branch hrang hrang zinga pali chuan nikum khan kum hmasa lama an thawh chhuah chu nuai 10 chuangin an khûm thei a; nikum chhung khan distributor centre thar panga - Zemabawk, Lungsen, Lengpui, Pawlrang leh Biate-ahte an nei thar a ni.

Synod Bookroom hian Mizoram pumah branch 12 leh distribution centre 24 a nei mek a ni.