Eptute'n SEC thununah sorkar an puh

Mizorama opposition party-te chuan thuchhuah inṭâwm siamin, June 2, 2015-a opposition party-te'n Aizawl Municipal Council-a hmeichhe ward tur thlan fel thuai ni se tia State Election Commission an ngenna anga June 10, 2015-a SEC office-a hmeichhe ward thlan tura ruahman tawh Chief Cinister-in UD&PA Minister kal­tlanga a ṭhulhtir chu ṭha lo an tih thu an tarlang.

Eptu party-te tarlan danin, AMC-a hmeichhe ward pawhna turin SEC-in June 3, 2015-ah meeting kohna a siam tawh a; mahse chhuanlam mumal awm loin CM Lal Thanhawla'n UD&PA minister kaltlangin meeting chu a ṭhulhtir a ni. "Dan tlawhchhan tur awm si loa sorkarin a hranpaa thuneihna neia din SEC a palzût leh a duh ang anga a kaltir hi keini BJP, ZNP, MNF leh MPC-te chuan dik kan ti lo a ni," an ti.

Opposition party-te chuan, "An thil tih dan han hriat hian, a hmaa fair taka hmeichhe ward tur ṭhum vâwr ngeia thlan fel ang kha ngam tawh loin, an duh zâwng zâwng hmeichhe ward atana ruat mai an tumnaah kan ngai," an ti bawk.

Eptu party-te sawi danin, UD&PA Secretary-in August 9, 2010-a hriattirna a chhuaha paragraph 3-naah chuan, SEC-in political party-te leh NGO-te nen hmeichhe seat tur chu ṭhum vâwra tihfel ṭhin tur a ni tih a ni.

Congress sorkar chu mipuite tana rualkhai, dik leh felfai taka thil ti thei lo tura SEC khuah­khirhah puhin, epty party-te chuan, sorkarin SEC thunun a tum a nih chuan na taka an do zel dawn thu an sawi a; "Autonomous body ni tura din SEC thuneihna chhuhsak a, dan leh hrai pawisa lo leh, mipuite zahpahna nei miah loa Congress sorkar an kal hi a vanduaithlakin zahpuiawm kan ti takzet a ni," an ti.