Mizoram pumah Green Mizoram Day

Nimin kha Green Mizoram Day a ni a, Mizorama district headquarters tinah hman a ni a, thing ṭiak ṭhahnem tak phun a ni.

LUNGLEI

Green Mizoram Day hi Lungleiah chuan Pukpuia Centenary Park-ah neih a ni a, Lunglei DC, an District Green Mizoram Committee chairman ni bawk DC Ashish Madhaorao More-a'n inkhawm kaihruaiin, Lunglei HPC vice chairman S Laldingliana khuallian a ni.

S Laldingliana chuan, ṭhangtharte tan khawvel nuam leh chenna tlak siam chu tuna awm mekte mawhphurhna a nih thu sawiin, "Thingphun uar leh environment humhalh kawngah sorkar hmalakna piah lamah zirna in, kohhran leh NGO ang pawhin ṭan lak a ṭul," a ti. MJA Lunglei president K Lalrinpuia leh YMA Lunglei sub-hqrs president R Lalnunthara ten thu an sawi bawk.

DFO Lunglei H Lianmawia'n report a pek danin, kum 2014-a Lungleia Green Mizoram Day hmannaah sorkar department leh pawl 64-in thing 268 an phun a ni.

Lungleia Green Mizoram Day hman­naah hian lawmman chi hrang hrang sem a ni a, lawmman dawngtute chu a hnuaia mite hi an ni. Lunglei district-a sorkar office zawng zawng leh NGO hrang hrangte'n thing phun leh thing phun tawh sa hmun samfai hnatlang an nei bawk.

Thing phun enkawl ṭha:

1-na - UD&PA

2-na - BDO, Lunglei

3-na - Soil & Water Conservation

Thing phun puitling tawh enkawl ṭha:

1-na - Excise & Narcotics

2-na - EE, PHE office

3-na - AIR, Lunglei

Kângmei venna thu ziak ṭha:

1-na - Zochhiar

2-na - Daifim

3-na - Hnamdamna

Ram kâng ven ṭha khua

1-na - Hmuntlang

2-na - Lungleng ‘S’

3-na - Ṭawipui ‘S’

SAIHA

Saihaah chuan MADC CEM bangla tualah hman a ni a, Saiha addl. DC N Chakhai-in inkhawm kaihruaiin, MADC CEM RT Zachono khuallian a ni. RT Zachono chuan, nungcha, thing leh maute chu Pathianin mihringte enkawl tura a siamte an nih thu sawiin, "Mizoram sorkar leh MADC sorkar ten thing leh maute humhalh hi a tum tlat a ni," a ti.

Inkhawmah hian Saiha district-a mahni khaw ram chhung kângmei laka venghim ṭha khuate hnenah lawmman pek a ni a; pakhatna Lungbun hnenah Rs. 1,00,000, pahnihna Laki hnenah Rs. 70,000 leh pathumna Chakhang hnenah Rs. 30,000 hlan a ni.

Saihaa Green Mizoram Day hmannaah hian khawpui chhung kawngpui dungah sorkar department hrang hrangte'n thing ṭiak ṭhahnem tak an phun a; kum hmasa lama thing phun tawhna hmunhmate an sâm fai bawk.

LAWNGTLAI

Green Mizoram Day pual hian Lawngtlaiah chuan DC Conference Hall-ah inkhawm neih a ni a; Lawngtlai DCF (WL) PC Lalchhandama'n kaihruaiin, addl. DC R Lal­sangluaia khuallian a ni. Khual­lian bakah, LADC sorkara exe­cutive member (Forest) H Chhuanawma'n thu an sawi.

Lawmman chi hrang hrang sem a ni a; kumina kângmei venhim kawnga ti ṭha khuate chu - pakhatna Rulkual, pahnihna Siachangkawn leh pathumna Vawmbûk te an ni. Sorkar department-te leh tlawmngai pawlte hnenah thing phun tur 430 sem a nih bakah, Lawngtlai khawpui chhungah leh Lawngtlai-Mampui kawngpui kamah thing phun hnatlang neih a ni.

Inkhawma an tarlan danin, Lawngtlai district-a Green Mizoram Day-ah kum 2014 thleng khan thing ṭiak 16,754 phun tawh a ni a, chung zinga 7,905 chu an dam chhuak a ni.

SERCHHIP

Serchhipah chuan zing dar 8:30-ah DC Conference Hall-ah hman a ni a, addl. DC VL Remliana'n kaihruaiin, Women Commission chairman Vanlalawmpuii Chawngthu, MLA khuallian a ni.

Khuallian chuan, thing phun mai ni loin, a enkawl puitlin kawngah ṭan lak nasat a ngaih thu a sawi a, "Thing phun ve thei lo leh peih lo kan awm a nih pawhin, mi phun sa hi chu i humhalhpui ang u," a ti.

Green Mizoram Day puala inkhawm zawhah Serchhip Zawlpui phai panna kawngah leh Kawlri tlánga Eklavya School compound-ah sorkar department hrang hranga thawk te, YMA Serchhip sub-headquarters leh Serchhip district MJA member-te'n thing phun hnatlang an nei a; hlawm 33-ah inṭhenin, thing ṭiak 525 an phun a ni.

Serchhip district-ah hian North Vanlaiphai Sub-Division, Thenzawl Sub-Division leh East Lungdar RD Block-ahte Green Mizoram Day hman a ni bawk.

Serchhipah ramngaw humhalh ṭha leh kangmei veng ṭhate hnenah lawmman hlan a ni a; a hnuaia mi hi lawmman dawngtute an ni.

Kângmei veng ṭha khua:

1-na - Chhingchhip Mualpui

2-na - Thinglian

3-na - Lungchhuan

Kângmei venna thu ziak ṭha:

1-na - Lenkawl

2-na - Zothlifim

3-na - Serchhip Times

Kangmei venna tilang ṭha

1-na - Serchhip Cable Network

2-na - TT Vision, Serchhip

CHAMPHAI

Champhaiah chuan CHANEM kawtah a hawnna inkhawm neih a ni a; Champhai DFO Vanlalchuailova'n kaihruai­in, Champhai DRDA project director CC Lalchuangkima khuallian a ni. Sorkar department te, NGO-te leh zirlaite an tel a, Champhai SP RP Meena-in a hmanpui bawk.

Inkhawmah hian kum 2014-2015 chhunga ram tikâng lo khaw pangate hnenah lawmman hlan a ni a; chungte chu -Lungtan, Vangchhia, Buang, Riangtlei leh Vangtlang-te an ni. GM HSS lecturer Lalrammawii hnenah thing phun kawnga a thawh hlâwk avangin Special Award hlan a ni.

Green Mizoram Day-ah hian Champhaia sorkar department te, tlawmngai pawlte leh zirlaite'n hmun 11-ah thing ṭiak 1,000 chuang phun a ni.

KOLASIB

Kolasib district-ah chuan Highway Restaurant, Thing­dawlah a hawnna inkhawm hman a ni a, Kolasib DC Jiten­der Yadav-a'n kaihruaiin, parliamen­tary secretary Hming­dailova Khiangte khual­lian a ni. Hming­dailova Khiangte chuan, Green Mizoram Day chu ni khat chauha tihpuitlin theih a ni lo tih a sawi a, "He ni hman hnu hian Green Mizoram Day-in a tum ber, thing phunte châwl loa enkawl zui chu a inṭan dawn chauh a ni," a ti.

Inkhawmah hian ram kâng tur veng ṭha khuate hnenah lawmman hlan a ni a; pakhatna Hortoki, pahnihna Serkhan leh pathumna Mualkhang an ni. Inkhawm zawhah khuallian leh mi pawimawh dangte'n Highway Restaurant compound-ah thing an phun a, sorkar department hrang hrangte'n Thingdawl ICDS Complex-ah thing an phun bakah, 05 Riders-te'n rally an nei bawk.

Kolasib DFO Saurabh Sharma sawi danin, kum ruk kal ta chhungin Koalsib district-ah thing ṭiak 55,000 phun a ni tawh a, kum 2014 bikah 4,100 phun a ni.

MAMIT

Mamit-ah chuan Chhim Veng YMA Hall-ah hawnna inkhawm hman a ni a, Mamit SP C Lalnunmawia'n kaihhruaiin, DC Vanlalngaihsaka khuallian a ni.

Vanlalngaihsaka chuan, "Mamit district-ah Green Mizo­ram Day apiangin kum tin thing ṭiak phun thar ṭhin a ni a, ṭhing 46,094 phun a ni tawh a, a lawm­mawm hle," tiin, thing phun uar zel turin mi tinte a sáwm.

Inkhawmah hian lawmman chi hrang hrang sem a ni a; best electronic media in fire prevention-ah LSS Vision thlan a ni. Inkhawm zawhah Mamit leh Bairabi inkar kawngpui kamah sorkar department hrang hrangte'n thing ṭiak 120 an phun a, kum hmasa lama phun tawhte hmunhma an tifai bawk.

Kângmei veng ṭha khua:

1-na - Chungtlang

2-na - Zamuang

3-na - Saithah

Kangmei vênna chhuah ṭhate:

1-na - Mamit Times

2-na - Zolamtluang

3-na - Hmarveng Aw

Green Mizoram Network

Green Mizoram Network (GMN) pawhin nimin khan Tourist Lodge, Chaltlangah Green Mizoram Day an hmang a; an member, kawng hrang hranga mi hlawhtling leh entawn tlak mi 11 hnenah chawimawina an hlan bakah, thing ṭiak eng emaw zat an phun a ni.