Geology & Mineral Resources minister hoin Maubuang-a oil leh gas zawnna tlawh
Maubuang rama tuialhthei leh gas zawn hna (Oil & Gas exploration) thawh mek chu nimin khan Geology & Mineral Resources (G&MR) minister H Rohluna, parliamentary secretary (G&MR) Joseph Lalhimpuia leh parliamentary secretary Col. ZS Zuala ten an tlawh.
He hmun enkawltu Oil India Ltd. hotute chuan lei hnuai km 4.5 a verh tura ruahmanaah nimin thleng khan kms. 3.9 an verh tawh thu an lo sawi a. Oil India Ltd hotute sawi danin, oil exploration hi July 7, 2014-a ṭan a ni a, thla thum chhung vela verh zawh hman tura beisei ni mah se, harsatna an tawh avangin an verh chak thei lo.
Maubuang ram leilung hi a chan lutuk avangin an beisei anga an verh chak theih loh bakah, a verhna khawl ha chu a bil hma a, a verhna ha thlak tur hian phawrh leh vek ṭhinte a ṭul avangin kum khat dawn lei an verh phah dawn ta a ni.
Oil India Ltd. hotute chuan lei verh hna kalpuina sensoah nitin cheng nuai 14 bawr seng anga chhut a nih thu sawiin, fimkhur takin an kalpui tih an sawi a; a verhna aṭanga lo chhuak tui leh chirh ekchhiate chu uluk taka enkawlna (treatment) pek a nih thu an sawi.