Good Governance Week hawn a ni

Nimin khan Aizawl, Serchhip, Lawngtlai, Saitual, Khawzawl leh Hnahthial district-ah sorkar laipui ruahman angin Good Governance Week hawn a ni. Kumina Week thupui chu 'Prashasan Gaon Ki Ore (Taking Administration to Villages)' tih a ni a, December 24, 2024 thleng hman a ni ang.

Sorkar thuchhuah tarlan danin, Good Governance-in a tum ber chu mipui tana sorkar inrêlbâwlna ṭha siam a ni a; prime minister hlui Atal Behari Vajpayee (L) pian champha, December 25 chu sorkar laipuiin Good Governance Day-ah a puang a, kum 2014 aṭangin kum tin hman ṭhin a ni.

Kumina Good Governance Week thupui, Prashasant Gaon ki Ore-in a tum ber chu, thingtlang khuaa chêngte'n sorkar hmalakna leh scheme ṭha tak takte an chhawr ṭangkai theihna tura awlsamna siamsak a ni a; khaw hla tak tak aṭanga khawpuia office dàwr ngai fo ṭhin tihziaawmna turin sorkar hnathawkte'n mipui pan chilhin, fehchhuah hun hman ṭhin a ni dawn.

Aizawlah chuan Good Governance Week hi Aizawl DC pisa tualah DC Lalhriatpuia hoa hman a ni. Aizawl DC chuan India rama Good Governance Week hman chhoh dan te sawifiahin, "Ram inrelbawlna ṭha nei turin sorkar hnathawkte mawhphurhna a sang," a ti a, eng level-ah pawh rinawm taka hna thawk a, sorkar inrelbawlna chu mipui rawngbawlna a ni tih vawng reng chungin theihtawp chhuah turin kalkhawmte a fuih.

Good Governance Week hi Serchhipah chuan DC Pisapui Hall-ah bawrhsap Paul L Khuma'n a hawng a; sorkar hnathawkte chu dan zâwm chung leh a dik chin kal pêl si loa mipui tana hmasawnna leh awlsamna zawng zel turin a chah.

Lawngtlai DC Cheemala Siva Gopal Reddy chuan DC conference hall-ah Week a hawng a; 'Workshop on Good Governance Practices' neih nghal niin, thupui hrang hrang zirho a ni.

Saitualah chuan bawrhsap Dr Lalngura Tlau-in a hawng. Bawrhsap chuan, Good Governance chu sorkar hnathawk zawng zawngin an hriat a pawimawh thu a sawi a, "Sorkar hnathawkte hi mipui tana hna thawk tur kan ni a, mipui dawrna kawngah fel leh hawihhâwm inzirtir a ṭul," a ti.

Khawzawl DC conference hall-ah district bawrhsap K Vanlalṭhiana'n Good Governance Week a hawng a; mipui vuivaina leh an harsatna a tam thei ang ber chinfelsak turin sorkar hnathawkte a chah bakah, sorkar office-te chuan mipui hnenah service ṭha tak pek chu an tihmakmawh a nih thu a sawi.

Hnahthialah chuan bawrhsap Rita Lalnunmawii Pachuau hoin DC conference hall-ah sorkar office hrang hrang hotute'n Good Governance Week an hmang. Bawrhsap chuan, sorkarah inrêlbàwlna chak leh ṭha zawk a awm theih nan Public Grievance Redressal system ṭha tak a awm a ṭul thu a sawi a ni.