Congress ṭhalaite'n kudam an enfiah; Buhfaiah thlaphâng lo turin mipui an chah

Mizoram Pradesh Youth Congress Committee (MPYCC) chuan, Muanna Venga Supply kudamah buhfai a awm lo tih thu an dawn avangin nimin khan an tlawh tih an tarlang a; thawktute'n retailer tinah buhfai pek chhuah kim a ni tawh tih an lo hrilh avangin thlaphâng lo turin mipui an chah.

MPYCC president Laltawnliana chuan, Supply kudam an enfiah chu sorkar tihmualpho tum vang hrim hrim a ni lo a, mipuite manganna thu an hnena a thlen vanga tlawh an nih thu a sawi a; retailer tinah buhfai pek chhuah kim a nih tawh thu kudama thawkte'n an lo hrilh avangin thlaphâng lo turin mipui a chah a ni.

Laltawnliana chuan, "Opposition mah ni ila, sorkar hi mipui tana an thawh ṭhat chuan kan lawm a, kan thlâwp a ni. A hunah chuan sorkar hi an diknaah chuan puih leh thlawp kan inhuam reng a, mahse, mipuite'n an chanvo tur a hun taka an chan loh a, mipui tawrhna a thleng dawn a nih chuan huai takin mipui tan ke kan pên zel dawn," a ti.

Congress ṭhalai President chuan, ration card var neite tan ration buhfai man a lêta tihpun a nih avangin kohhran buhfaiṭhamah hmun tam takah chuan buhfai pek aiin pawisaa thawh an pung nasa niin a sawi a; buhfaiṭhâm thawh turah chhungkaw tam tak an buai phah titih niin a sawi bawk.