Bairabi-ah buhfai a tam tâwk; Thlaphânna tur a awm lo - FCSCA

Food, Civil Supplies & Consumer Affairs (FCSCA) department chuan, Bairabi-ah buhfai chhêk khâwl a tam tâwk tih sawiin, "Buhfaiah thlaphânna tur a awm lo," an ti.

Vanglaini palai zawhna chhangin FCSCA department hotute chuan, kumin fûr laiin Jamira, Hailakandi district-ah rél kawng a chhiat thu an sawi a, "Rêl kawng chhiatna hmun hi FCSCA minister B Lalchhanzova'n October 2024 khan a tlawh a, Guwahati-ah North East Frontiers Railways General Manager a sawipui nghal bawk," an ti a, rêl kawng chhiat chhung chuan thla thum a awh thu an sawi.

Supply department hotute chuan kumin August, September leh October thla khan Food Corporatin of India (FCI)-in Bairabi-ah buhfai an phur thleng miah lo tih sawiin, "NE Frontiers Railways, FCSCA Minister leh a thawhpuite'n theihtawp chhuaha an nawrna avangin October 2024 thla tàwp khan rêl kawng a tlang a, buhfai thleng hmasa ho chu November thla semahte hman a ni," an ti.

Theihtawp chhuaha buhfai phurh luh kalpui reng a ni tih sawiin FCSCA dept. chuan, "Chutihrual chuan, Bairabi-ah transformer ni ruk chhung a chhiat avangin online-in buhfai hi pek chhuah theih a ni lo. December 19 thlengin online hmanga pek chhuah theih a la ni lo a, December 20 aṭangin Bairabi-a truck awm ang angte'n buhfai an phur chhuak a ni," an ti.

FCSCA department hotute sawi danin, buhfai mamawh ang chu ni hnih chhunga thiar zawh theih beisei a ni a, nimin khan truck 40 velin an phur chhuak. FCI-in Mizoram buhfai quota thla tin quintal 53,000 vel an pek a ngai a, chu bakah chuan ration card var-te buhfai tur pawh FCI-in a lei belhtir ṭhin.

Krismas leh kum thar hunpui laia FCI lamin buhfai thiar chhuahnaah harsatna an tâwk a, pawi an tih thu sawiin FCSCA department hotute chuan, "Bairabi aṭangin Manipur tan buhfai pek a ngai tel bawk nen, kan harsatna tawh hi min hriatthiampui turin Mizoram mipui kan ngen. Tun dinhmunah Bairabi-ah buhfai chhêk khâwl a tam tâwk a, thlaphânna tur a awm lo," an ti.