Governor-in hunpui thleng turah Mizoram mipui duhsakna a hlan

Governor Dr Hari Babu Kambhampati chuan Krismas leh kum thar hlim taka hmang turin Mizoram mipuite duhsakna a hlàn a, kum thar 2025-in muanna, hmasawnna leh hlawhtlinna Mizo mipuiteah thlen se a duh thu a sawi.

Governor chuan, tun hnaiah Aizawl khawpui chu India ram khawpui zinga boruak thianghlim ber a nih thu sawiin, "Boruak thianghlim kan neih theihna tura hmalakna hi tun hunpui lo thleng turah pawh vawng nung tlat tur leh boruak tibawlhlawh lo zawnga Krismas leh kum thar lawm turin Mizoram mipui ka ngen tak meuh meuh a ni," a ti.

Dr Hari Babu Kambhampati chuan, "Tun hma lam zawnga dan leh thupek ṭha taka zâwm chunga hunpui hman a lo ni tawh ṭhin kha chhuanawm ka ti a, kuminah pawh hian chhunzawm leh ngei kan tum tur a ni," a ti a; tu leh fate tana chênna tlâk khawvel siam tura lungrual taka sorkar hmalaknate ṭha taka ṭawiawm zel turin Mizo mipui a ngen.

Krismas hun laia induhsakna lantir nana thilpek inhlan ṭhinte chuan Mizote thilphalna a pho lan thu leh, mi baihvai leh dâwm kân ngaite tana luanchhuah chu entawn tlak a tih thu sawiin Larsap chuan, "Mahni chhungte kianga hunpui hmang ve thei lo tur, mi dangte tana rawngbawlna hna thawk mek - sipai, hriselna lama thawktute leh mi dang eng emaw zat an awm a, he'ng mite hian mahni aiin mi dang an dah pawimawh hmasa a, Krismas awmzia leh nihna chiang takin an tarlang a, an ngaihsanawm tak zet a ni," a ti.

Governor chuan, Prime Minister kaihhruaina hnuaiah India ram chuan kum 2047-ah ram changkang leh intodelh 'Vikshit Bharat' nih tumin ṭan a la mek tih sawiin, "He dinhmun thleng tur hian Mizoram pawhin mawhphurhna pawimawh tak a nei a, India ram hmasawnna tur ruangám duanah Mizoram a tel ve a ṭul," a ti a; sorkar laipui policy leh programme-te ngaihven ṭhin tur leh a hlawhtlin theih nan phûr taka ṭawiawm turin Mizoram mipui a sáwm a ni.