KHAWTHLIR

Ṭanpuina hlan

Mizoram Cooperative Apex Bank chuan Krismas pualin nimin khan mi harsa zawkte tana luanchhuah hun an hmang. Apex Bank hi chairman Lalnunsanga leh CEO A Lallungmuana te hoin an thawk chhuak a, Ṭawngṭai Bethel Camping Centre leh TNT-ah Rs 50,000 ve ve leh ei leh in tur ṭhahnem tak an hlan. District danga Apex Bank branch-te pawhin hmun hrang hrangah Krismas thilpek an hlan bawk.

Sangha mantute Police-in man

Mamit police-te chuan December 18, 2024 khan Teirei lui humhalh laia bomb hmanga sangha mantu Vanlalṭhapuia leh Lalnunhlua, Darlak khua ve ve an man a, thubuai an siamsak. Vanlalṭhapuia leh Lalnunhlua ten sangha an man sa kg. 9 pawh an man nghal bawk. An pahnih hian December 19 khan court-ah hruai an ni a, court remtihnain Mamit District Jail-ah dah an ni.

MLA-in hlan

Siaha bialtu MLA Dr K Beichhua chuan nimin khan Siahaah District Jail, damdawi-in, orphange home leh ruihhlo ngaite enkawlna hmunte a tlawh a, Krismas thilpek a hlan. Dr K Beichhua chuan, Siaha District Hospital a tlawhnaah thawktute'n tui harsatna sutkianna atana an mamawh an lo sawi a, tuizem litre 3,000 pahnih leisak nghal an nih tur thu a sawi.

Râltlân ṭanpuina

Serchhip bawrhsap Paul L Khuma chuan Serchhip district-a khua/veng 25-a raltlan mi 558 hnena pek tur buhfai quintal 117.5 nimin khan a vailiam a; YMA branch hrang hrang hruaitute hnenah raltlante ṭanpuina tur pawisa a hlan bawk.

Chetsualnaah thi

Amos Lalmalsawma (19) s/o C Lalsangzuala, Lunglei Salem Veng chu December 19, Ningani zan khan bike-in a chesual a, chetsualna hmunah ká chhawn lohin a thi. Thu dawn danin, Amos Lalmalsawma hi zan dar 11:30 velah Lunglei Bazar Veng, TT Hall hnuai kawng kâwiah amah tâwk zawnga tlân truck hnuaiah a inbarh lut a ni.