Kut hnathawktute tan kâwl a êng zel - ZPM Ṭhalai President

ZPM Ṭhalai president Jeje Lalpekhlua, MLA chuan nimin khan press statement a tichhuak a; kalphung thar sorkar hnuaiah kut hnathawktute tan káwl a êng zel niin a tarlang.

Jeje Lalpekhlua chuan, December 19, Ningani khan Agriculture minister PC Vanlalruata'n chak taka a hmalakna zarah Om Om Modern Rice Mill, Pangbalkawnah buh hûm lei ṭanna hun hman a nih thu a tarlang a, "A ṭum khatna atan Kolasib district leh Mamit district-a kut hnathawktute buh thar chhuah pilot project atan lei hmasak phawt a ni," a ti.

Mizoram hmun hrang hrangah buh hûm chhunzawm zel tura ruahman a ni tih tarlangin Jeje-a chuan, "Mizorama kut hnathawktute tan chanchin lawmawm tak a ni. Kut hnathawktute buh thar sorkarin a leisak ṭan ta hi kut hnathawktute kan lawmpui tak zet," a ti a; hma latu Agriculture Minister an chhuan thu a sawi.

Jeje Lalpekhlua chuan, buh hûm chu kg. khat Rs 30 zelin sorkarin a lei dawn thu a sawi a, "Mipui sorkar, chief minister Pu Lalduhoma hnuaiah kut hnathawktute tan káwl a êng zel hi a lawmawm hle a ni," a ti.

ZPM Ṭhalai President chuan, Mizoram chhunga ram mipuite buh thar sorkarin man man taka a lei zel chuan nakin lawkah Mizoram sorkarin state páwn aṭanga buhfai leina atana kum tin cheng vbc. 184 vel a sèn ral ṭhin chu hum theih a beisei thu a sawi a; chumi tur chuan Mizo ṭhalaite theihtawpa kut hnathawhnaah hma la turin a ngen.

Kalphungthar, mipui sorkarin theihtawpin Mizoram lo neia eizawng, kut hnathawktute dâwm kân a tum tih tarlangin Jeje Lalpekhlua chuan, "Thawhrimna leh taimakna hmanga Mizo mipui intodelhtir hi a tum bulpui ber a ni. Mizoram sorkarin buh hûm a lei hian budget-ah kut hnathawktute tan pawisa a dah theihzia a tilang chiang hle a ni," a ti.