Minister-in lei tlahniam a tlawh

Aizawl North-III bialtu MLA K Sapdanga, minister chuan nimin zing khan a bial chhung Hunthar Venga lei tlahniam leh tun hnaia Hunthar Venga hmasawnna hna thawhte a tlawh a; PWD leh SLT company hotu te, Hunthar Veng Local Council leh YMA hruaitute'n an ṭawiawm.

K Sapdanga chuan, hna thawktute chu lei tlahniam siamṭha tura hmalak mek dan a zâwt a; Hunthar Veng mipui leh kawng hmangtute tana harsatna nasa zawk a thlen zel loh nan chak zawka hma la turin a hrilh.

YMA, Hunthar Veng Branch Hall plaster leh rawng hnawih mek te, Hunthar Veng Middle School bula lei (bridge) dawh leh veng chhung inkal pawhna lei siamte Aizawl North-III Bialtu MLA hian a tlawh nghal.

K Sapdanga chuan, hna thawh la tam lo mah se, thawh chhun chhun ṭha taka thawh a ni chu lawmawm a tih thu sawiin, "Hun lo kal zel turah pawh hna ṭha taka thawh a nih zel ka beisei," a ti a, a remchan dan ang anga hna thawhte a hmuna en zel a tum thu a sawi.