Anti corruption-ah kan ṭhang chak hle - Chief Minister

Chief minister Lal Thanhawla chuan nimin khan New Secretariat Complex-a Anti Corruption Bureau (ACB) pisa thar a hawng. CM Hawla chuan, Mizoram chu eiruk loh leh eiruk dona (anti corruption) lamah a ṭhang chak hle niin a sawi.

ACB office hawn inkhawm hi chief secretary Lalmalsawma'n a kaihruai a, Chief Minister chuan, sorkarna an chan hnuah an intiam angin ACB an tihlen thu a sawi a, "ACB tihlen mai duh tawk loin, ACB mi leh sa eng emaw zat CBI academy-ah kan training tir bakah, CBI academy-a mithiamte chah chhuakin Mizoramah ACB hnathawkte tan training buatsaih a ni," a ti.

CM Lal Thanhawla chuan corruption-in Mizoram a ei chhiat lohna atan vên tlân a ngai tih sawiin, "ACB-te hi hlemhlêtna min venpuitu ṭha ber an ni," a ti a; ACB mi leh sate chu ṭha lehzuala hna thawk turin a fuih.

Mizoramah sorkar in sak a nihin contractor-te'n an tihduhdah ṭhin thu sawiin, Lal Thanhawla chuan, "Hei hi thil duhawm lo tak a ni a, sim a ngai tak zet a ni. Supervision a ṭhat loh avangin hna a ṭha lo ṭhin. PWD engineer-te hna thawhna hmuna an kal ka hmu khát hle," a ti.

State danga a kalnaah police officer-te khawlaia an duty a hmuh ṭhin thu sawiin, Chief Minister chuan, "Police officer khawlaia duty ka hmuh hian ka awt ṭhin hle. Kan ramah chuan an intilal ringawt emaw tih mai a awl ṭhin. Hetianga police officer-te an vahchhuah hian an zahawm bakah, thil tih a awlsam phah a ni," a ti a; naute'n hna an thawh ṭhat theihna atan pute'n an thawh ṭhat a pawimawh thu a sawi.

Lal Thanhawla chuan, ruihhlo avanga man, thubuai rip tak tura ngaihte pawh an chhuak leh mai ṭhin chu judicial lam mite a sawipui tawh tih sawiin, "Police lamin a hun taka chargesheet an peih loh avangte leh chargesheet a ṭhat tawk loh vang a nih thute min hrilh a ni," a ti.

ACB office hi February 23, 2013-ah sak ṭan niin, February 28, 2015-ah sak zawh a ni a, a sakna atan cheng nuai 455.57 hman a ni.

ACB hian tun dinhmunah thubuai chhui zui tlak a nih dawn leh dawn loh buaipui mek (preliminary enquiry) paruk, criminal case chhui mek 12 leh chargesheet an thehluh tawh Court-a ngaihtuah tura awm mek 27 an nei a ni.