KHAWTHLIR

MUCO meeting
MUCO Bank Ltd. chuan nimin khan Synod Conference Centre-ah Annual General Meeting vawi 23-na an hmang a, chairman R Liantluanga'n a kaihruai. Secretary report-a a lan danin, MUCO Bank-ah hian share capital awm zat chu cheng nuai 377 a ni a, kumina sum dah zawng zawng chu nuai 3,908 a ni. Kum 2014-15 chhungin mi 581 hnenah nuai 1,027 an pûktir a, cheng nuai 71 an hlêp a ni.

Saphu káwr man
Champhai police leh 10 Assam Rifles ṭangkawp chuan nimin khan Farkawnah Saphu káwr kg. 216 an man. Saphu káwr hi Hmangaihthangi (38) d/o Chhawnkima (L), Kawlkulh nia insawiin a ta a nih thu a sawi. Hmangaihthangi hi Environment & Forest department-ah hlanin, Wildlife Protection Act, 1972 hnuaiah thubuai an siamsak a ni.

Vawk notê sem
Animal Husbandry & Veterinary department chuan nimin khan Kolasib district-a vawk vulh thlangtu mi 457 hnenah vawk notê pali ṭheuh an sem. Vawk notê dawngtute hi Bilkhawthlir, Vairengte, Thingdawl, Kawnpui leh Hlimen tlangdunga khaw pariatte an ni.

Ph.D hmu thar
Zonuntluanga chuan Mizoram University-a Commerce department aṭangin doctor of philosophy a hmu thar a; a thesis title chu 'Management of Non-Performing Assets in Banking Sector: A comparative study of the Select Banks in Mizoram' tih a ni.

Book Fair hawng
Bookline, Kolkata leh Maggie L Ralte ṭangkawp chuan, nimin khan Vanapa Hall-ah 8th Aizawl Book Fair 2015 an buatsaih ṭan a, minister Lalsawta'n a hawng. Book Fair hian June 25, 2015 thleng a awh ang.

Thisen pe
Bungtlang bial ṬKP-te chuan June 11 khan BCM Rawpui Centenary Hall-ah Christian Hospital, Serkawn tan thisen unit 60 an pe a, a petute mipa 45 leh hmeichhe 15 an ni.