NPCDCS & NPPCD awareness campaign nei

National Programme for Prevention & Control of Cancer, Diabetes, Cardiovascular Disease and Stroke (NPCDCS) leh National Programme for Prevention and Control of Deafness (NPPCD)-te chuan nimin khan Chanmari West YMA hall-ah cancer, zunthlum, lung natna leh beng natna chungchangah mipuite zirtirna hun an hmang a, a thlawna inentirna hun an buatsaih nghal.

Awareness campaign hi NPCDCS state programme officer Dr Lalruatdiki'n a kaihruai a; radiation oncologist Dr K Lalfak­zuala'n cancer awmzia, inven dan leh a enkawl dan a sawi. NCD state nodal officer Dr Eric Zomawia'n NPCDCS chungchang a sawifiah a; NPPCD consultant Dr Lalthanmawii Khalthang-in NPPCD hmalakna a sawi.

Dr Eric Zomawia chuan, khaw­vel changkang zelah nunphungin a zir loh vangin natna benvawn hlauhawm tak tak - cancer, zunthlum, lung natna, heart attack leh stroke nei leh thihpui an tam tial tial tih hmuhchhuah a nih thu a sawi a, "Awm âwl lutuka taksa sâwizawi ngai loh te, thau, mawm leh thlum ei nasat lutuk te, chi al ei tam te, thlai leh thei ei tlem vang te, vaiho leh zu tih nasat avangtein heng natnate hi kan nei thei a ni," a ti.

Aizawl Civil Hospital-ah NCD Clinic siam a ni a, chutah chuan zunthlum, BP sang, lungná leh cancer vei leh vei lo endik ṭhin a ni. Kum 30 chung lamte chu NCD Clinic-ah hian inentir ngei turin an sawm.

Awareness campaign zawhah hian Chanmari West High School-ah a thlawna inentirna hun buatsaih a ni a; mi 250 chuang inentirin, BP, zunthlum, cancer, ENT, FNAC, PAP smear te an endiksak a ni.