World Blood Donor Day hman a ni

Mizoram State AIDS Control Society (MSACS) leh Association for Voluntary Blood Donation (AVBD) gen.hqrs. huaihawtin nimin khan IPR Auditorium-ah World Blood Donor Day hman a ni a; khuallian Home minister R Lalzirliana niin, thisen pe ṭha pawl leh mimalte hnenah chawimawina hlan a ni.

Minister R Lalzirliana chuan, mite nunna chhan nana thisen petute chu an ropui tak zet tih sawiin, "Mite tana malsawmna ni turin thisen pek aia ropui a awm chuang lo. Thisen petute hi ṭhian chhan thih ngam a taka kengkawhtute an ni," a ti a; tunlai huna ṭhian chhan thih ngam lantirna chu thisen pek a nih thu a sawi.

R Lalzirliana chuan, khawvelah natna a pung zel a, thisen mamawhna pawh a sang zel tih sawiin, "Mithiamte'n damdawi ṭha hmuhchhuah belh zel mah se, thisen tlukpui an la siam chhuak thei lo. Thisen pek hmangin nunna tam tak chhan a ni tawh a, a dawngtu tan a lawmawm tak zet a. Thisen pek hi Lal Isua duh zawng a ni," a ti.

Home Minister chuan, sorkarin thisen pek a ngai pawimawh tih sawiin, "Thisen thianghlimn engtik lai pawha a mamawhtute'n an dawn theih hi kan duh ber a ni," a ti a; Mizo ṭhalaite chu thisen pek uar zel turin a sáwm.

Inkhawmah hian chairman Dr Lalbiak Kima, Hospital & Medical Education director leh MSACS project director Dr Lalmalsawmi Sailo-te pawhin thu an sawi a; thisen petu pawl hrang hrangte aiawhin Dr Tawnenga, Principal, Pachhunga University College leh thisen dawngtute aiawhin Zohmangaiha, Tachhip-in thu an sawi a, AVBD general secretary C Lalnunnema'n report a pe bawk.

World Blood Donor Day-ah hian kum 2014-15 chhunga pawl hminga thisen pe ṭhate hnenah khuallian R Lalzirliana'n chawimawina a hlan a; thisen vawi 30 pe tling tawh mipa 20 leh hmeichhia pathum hnenah AVBD senior adviser Lalbiakthanga Pachuau-in chawimawina a hlan.

Central KṬP hnenah thisen pe tam ber chawimawina, Special Award hlan a ni a, kum 2014-15 chhung khan donation camp 98-ah thisen unit 4,176 an pe a, a petute mipa 3,487 leh hmeichhia 689 an ni.

Mizo zinga thisen pe tam ber C Lalremruata, Electric Veng, Aizawl-in vawi 58 a pe tawh a, hmeichhe zinga pe tam ber Rebecca Saimawii, Khatla-in vawi 40 a pe tawh.

Category tina thisen pe tam berte chu - Religious Group-ah ṬKP Coordination, Aizawl (unit 200); YMNA category-ah Chanmari West Branch YMA (unit 161); Educational Institution category-ah Pachhunga University College (donation camp vawi 5-ah unit 509); Miscellaneous category-ah Inter College Adventure Club (unit 142)-te an ni.

World Blood Donor Day hi Saihaah pawh AVBD, Saiha Branch huaihawtin New Saihaa Model Youth Association Hall-ah hman a ni a, MADC secretary Pachi Hlychho-a'n a hmanpui. Saiha district-a thisen pe tam ber Laltharliana Hrahsel, vawi 39 pe tawh leh mi dangte hnenah chawimawina an hlan.

Champhaiah pawh AVBD buatsaihin Bethel High School-ah hman a ni a, an district-a thisen pe tam ber PC Lalchuangkima (vawi 47) leh hmeichhe zinga pe tam ber Chawngzikpuii (vawi 12)-te chawimawina hlan a nih bakah, pawl hminga thisen pa ṭhate chawimawi an ni.

World Blood Donor Day hi June 14 a ni a, kuminah Pathianni a nih avangin nimin khan hman a ni a, district ṭhenkhatah chuan vawiinah leh kar leh lamah an hmang ang.