Serkhan-Bagha kawngpui zauhnaah Mi 850-in zangnadawmna dawng dawn

Serkhan-Bagha kawngpui laihin ram a tihchhiata zángna­dawmna pek tur chu tihfel a ni tawh a, zangnadawmna sum pek chhuah tur chu Rs. 20,51,41,005 niin, a dawngtu tur zat chu mi 850 an ni.

Kolasib bawrhsap leh district collector Jitender Yadav chuan zawhna chhangin, Serkhan-Bagha kawngpui zauhnaa lei laihin ram a tihchhiata zangnadawmna pek tur chu PWD-ah sum dil mek a nih thu a sawi a; thlai leh ram hlutna an pek tur chu Mizoramin Land Acquisition Act a hman mek anga pek tura siam a nih thu leh, ram neitute'n pawisa an dawn tur zat chu Kolasib DC office-ah en theih a nih thu a sawi.

Thu dawn danin, Serkhan-Bagha kawng zauhin thlai leh ram a tihchiat man atana zangnadawmna ngai zat hi a tirah Rs. 12,04,80,896 a ni a; mahse ni 1,164 hnuah sorkarin Draft Award a pawm theih chauh avangin 12%-a a pung, Rs. 4,61,06,223.43 te, solatium 30% Rs. 3,61,44,268.80 leh, contingency 2% Rs. 24,09,617-te pek tel a ngaih tawh avangin tun dinhmuna sum pek ngai zat chu Rs. 20,51,41,005 a tling ta a ni.

Hetih lai hian, shop pass, house pass, land lease leh stall pass neitute chuan ram hlutna an dawn aṭanga 15% chu sorkarah an chhûn lêt a ngai ve thung dawn niin an sawi.

Serkhan-Bagha kawng laiha zangnadawmna la tur zat chu - Lungdai-ah mi pariat, Serkhanah mi 62, Nisapuiah mi 116, Lungmuatah mi 84, North Chal­tlangah mi 88, Bukpuiah mi 136, North Hlimenah mi 132, Saipum­ah mi 25, Saiphaiah mi 114 leh Thingthelhah mi 85 an ni.